政情：Eva鄭抗拒地產代理合照
「經濟動力」尋日搞咗個上車置業動力展，除咗搵三間物業代理公司參展介紹上車盤外，仲邀請到運輸及房屋局局長鄭汝樺（Eva）撐場添。Eva鄭起初喺活動上對啲上車盤表現得好感興趣，向職員提出好多問題。
原本局長諗住喺會場行個圈就走，點知呢個時候，其中一間參展物業代理美聯集團嘅太子女黃靜怡同高級執行董事黃錦康突然殺到，黃靜怡同Eva講，佢爸爸即係老闆黃建業有事嚟唔到。Eva反應冷淡，冇乜回應之餘，對眼仲繼續望住塊展板添。
梁君彥冇置業煩惱
當Eva準備離開，美聯有職員即時邀請佢同兩位公司高層合照，Eva起初好抗拒，仲好老實咁話同另外兩間地產代理都冇影相，所以佢自己唔想合照。
不過盛情難卻，最終都同咗兩位美聯高層合照，不過為咗唔想畀人覺得偏心，佢專登走去同另外兩間代理嘅職員合照，可惜Eva全程無乜表情，擺明唔太開心，唔知係咪驚畀啲地產代理將佢嘅玉照貼喺地產舖嘅門口，唔覺意做咗地產舖嘅生招牌。
講番個展覽，主人家之一嘅梁君彥一早到場打點，林健鋒同梁劉柔芬兩位主人家竟然仲遲過局長到場。梁君彥話，自己一直住喺屋企物業，所以並冇置業煩惱，不過佢提醒市民，買樓一定要量力而為，買樓前一定要計算清楚自己嘅負擔能力，唔好上錯車。