黑狗偷食，白狗當災。上月香港主場對黎巴嫩嘅亞洲盃外圍賽發生噓國歌鬧劇，罰則尋日出爐，香港足總被亞洲足協罰款三千美元。睇到喇，呢班偽球迷口口聲聲愛香港，其實係害香港咋。
講起就火滾，香港足總已先後兩次因為球迷噓國歌而被國際足協罰款，亞洲足協亦早作警告，明知一定有手尾跟，明知一定係香港足總首當其衝，港獨球迷依然樂此不疲，噓完又噓，原因好簡單，受罰嗰個唔係自己囉，罰金唔使自己畀囉，點會唔有恃無恐吖。有人話可能要重罰港隊閉門作賽，呢班大帝至肯罷休，都咪話唔可悲。
話時話，香港足總唔止一次躺着中槍，都算無辜咯，難怪副主席好無奈咁話今次罰款雖然唔算好甘，但始終對香港形象有好大損害，希望球迷停止呢種損人不利己嘅行為。可惜吖，言者諄諄，聽者藐藐，何況香港足總又唔係執法機構，頂多入場前加強安檢咁大把，治標唔治本，下次再有賽事舉行，港獨球迷一樣話之你嘅咋。
真係諗極唔明，香港足總就話冇牙力啫，港府「要槍有槍，要法有法」，對呢啲損害國家尊嚴嘅違法行為仍然隻眼開、隻眼閉，邊講得通o架？其實又有乜好奇怪吖，《國歌法》係就係已經喺全國實施，全國人大常委會仲通過納入《基本法》附件三添，之但係港府陽奉陰違，唔嗲唔吊，唔係事先張揚本地立法要一年咁耐，就係負責立法嘅官員棄甲做逃兵，律政司司長袁國強尋日被記者問起係咪辭職，仲笑咪咪話冇補充喎，簡直唔知醜字點寫。你話喇，喺港府「全面配合」之下，《國歌法》形同虛設，香港有乜法子唔烏煙瘴氣呀。
唔係講笑，日前有院校舉行畢業禮，部分學生拒絕喺奏國歌時肅立，證明呢股歪風好似傳染病咁不斷蔓延，特首林鄭月娥把口就讚揚校長嚴正指摘學生做得好啱，但其實冇港府一味縱容，班後生仔又點會咁不知分寸吖，港獨分子又點會得寸進尺吖。再講喇，以港府手指拗出唔拗入嘅特性，即使立法都係嘥氣，淨係拖延檢控佔中案已經有辦你睇，身為金主兼黑手嘅壹淫媒老闆漢奸黎一直逍遙法外，而佢涉及嘅恐嚇本報記者案，有圖有片有證據，律政司一樣當睇唔到，吹脹！
昨日因，今日果。香港之所以立立亂，港獨之所以甚囂塵上，講到尾就係港府姑息養奸，助紂為虐，所以話立幾多法都係枉然就係咁解。咪畀功夫茶批中，當局有法不依，執法不嚴，莫講話噓國歌，天下大亂都係差遲早嘅咋。