土地係香港最寶貴嘅資源，港產官僚更加係呻覓地難呻到樹葉落。其實睇真啲香港唔係冇地，弊就弊在當局暴殄天物，大量官地長期養蚊唔在講，被擅改用途圖利等亂象更加多不勝數。官老爺守住金庫哭窮，簡直吹脹！
本報接獲知情人士爆料，話地政總署多年前將鴨脷洲海旁道嘅海濱靚地，以最低每月一萬多元嘅超筍價，以短期租約形式租畀多間船廠，作臨時停靠待修船隻之用。雖然合約寫到明唔可以將船廠用地轉租他人，但有船廠一於少理，將泊位轉租畀豪華遊艇停泊，一個月最多收十萬銀，以每個船排可泊最少兩艘遊艇計算，扣埋短期租約成本，每個月淨袋十幾皮，都咪話唔和味。
咁地政總署又點回應呢？佢哋話早就收過相關「違泊」查詢，亦曾派員實地視察，可惜冇乜發現，於是去信所有相關船廠租戶，提醒佢哋短期租約用途限制，咁就當交咗功課。
唔使問阿貴，官老爺梗係求求其其去現場打個白鴿轉，之後就收隊返辦公室歎冷氣啦。呢嗱，本報記者以用家身份向船廠方面查詢，發現當中有好多蠱惑嘢，合約唔畀租上租咩，唔緊要，簽約時話係擺隻艇喺度保養就得，反正只要搵人出去望下隻船已經算係「保養」，當局根本吹佢哋唔脹，家陣通行都係咁做。你哋話嘞，咁大個漏洞喺度都懵然不知，地政官僚係咪食塞米吖！
話時話，遊艇泊位成為搶手貨，有價有市，背後亦反映當局規劃失當。本港遊艇數目過去五年大增超過兩成，泊位卻遠遠追唔上需求，甚至有錢都未必租得到。隨着內地富豪愈來愈多，「遊艇經濟」潛力無可限量，內地早排放寬粵港澳遊艇自由行去到九十天，有人憧憬會為香港帶來好大商機，查實香港連最基本嘅泊位供應問題都解決唔到，睇怕都係蜑家雞見水──睇得唔飲得咯。
唔理點都好，官地作為公家資源，家陣居然淪為商家佬嘅提款機，地政官僚真係要捉去打屁股。當然喇，官地資源被濫用以至被浪費，今次個案只係冰山一角。地政總署最近就畀申訴專員公署鬧爆，佢哋九四年向新界一幅農地業權人批出豁免書，批准興建一幢村屋，冇耐發現出現嚴重違規情況，結果前後拖超過二十年先肯執法。其他好似綠化地變住宅地，官地被霸佔當成貨櫃場、停車場等，就更加係亂過亂世佳人，數到天光都數唔晒。
古人話齋，為政不在多言。官老爺一時「寸土必爭」，一時「見縫插針」，再唔係成立專責小組，係威係勢咁款，與其姿勢多多，不如實實際際諗下點樣善用官地好過喇！