古人話︰「國家之敗，由官邪也。」一個地方嘅盛衰首要取決於官員嘅管治水平，好似澳門官僚咁，有法不依，質素低下，仲衰過清朝，有乜法子唔出事吖！
功夫茶啱啱鬧完澳門衞生局向申請「餵哺母乳證明」嘅媽媽誤收費用，以為BB飲奶要畀錢已經夠離譜，點知原來大人飲水更加可能要入廠，真係唔到你唔服！話說澳門巴黎人酒店今年四月爆出退伍軍人症，事隔超過半年，衞生局再次檢驗，發現酒店房間及大堂衞生間仍然含菌，六樓以下設施樣本有問題嘅比率更超過一半，萬一有旅客期間中招，呢班廢官吟詩都吟唔甩！
當地立法會議員就講得啱嘞，官老爺仍然遺留澳葡時期嘅賴皮惡習，平日無事無幹防患意識超低，出咗事卸得就卸，拖得就拖。前排外國醫學界人士一行七人由澳門返港，一名隨從被在場搞事者挑釁及投訴打尖，期間一度發生推撞，點知海關人員不分青紅皂白，將其他無辜成員一併扣查，態度要幾惡劣有幾惡劣。海關人員執法水平低唔講嘞，最過分係苦主有冤無路訴下向本報投訴，澳門當局面對傳媒追問，竟然借咗聾耳陳隻耳，關人個關。喂，連腐朽不堪嘅清朝，小民都可以攔轎告狀，擊鼓鳴冤，澳門官僚完全當民意冇到，甚至連第四權都唔放在眼內，想唔認「衰過清朝」都唔得。
又好似海關接連兩次倒掛五星旗咁吖。事發至今四個月，政府高層口講「不能接受」，實際上大玩拖字訣，到依家都冇人負責。咪畀人睇死，慌唔係想博件事丟淡，不了了之咩。嗱，咪話功夫茶唔提醒，根據澳門相關法律，任何人公然侮辱或唔尊重國家象徵，最高可被判監三年，當局咪使旨意高高舉起，輕輕放下。
所以幾時都話，世不患無法，而患無必行之法。呢方面，港產官僚真係烏鴉唔好笑豬黑。澳門海關倒掛五星旗，之前有人講笑，話不如搵個阿嬸返嚟好過「高薪養廢」，你咪話，香港電台幾年前真係試過求其搵個外判保安阿嬸負責升旗，結果真係出事，簡直吹脹。升國旗有法可依尚且亂晒大龍，國歌法本地立法前留下「真空期」，搞事分子更加好似攞正牌咁，玩嘢、侮辱無所不用其極。當然喇，即使日後順利立法，亦唔代表港府有能力、有意願執法。正如有人話齋，對付牛鬼蛇神，香港「要法律有法律，要槍有槍，要炮有炮」，但如果好似律政司司長袁國強之流咁，一味放軟手腳，刀槍入庫，講乜都嘥氣！
冇計喇，港澳管治難兄難弟，半斤八両，正式係海軍鬥水兵──水鬥水，既然自己唔爭氣咯喎，不如乾脆行一國一制好過！