當見到性感迷人嘅美女時，男士們第一時間嘅反應係心跳加速，但又係咪只有性感美女，先至會令男士產生呢種反應呢？其實唔一定要下下露出事業線，或者展露美腿嘅，單純美感已經足夠令男士心動不已，而嚟自南韓嘅模特兒崔星兒正係其中一位。
究竟美女會唔會覺得自己係美女呢個問題，其實可以話係一啲意義都冇，因為不論當事人覺唔覺得，都唔能夠影響其他人對佢嘅觀感。雖然係咁，但呢種對自己嘅認知，卻會影響一個人嘅未來。點解咁講呢？話說出生於南韓首爾嘅崔星兒，由細到大都唔覺得自己靚，事關塊面同身形都有啲肥，唔單止佢，連身邊人亦未諗過佢會成為一位職業模特兒。不過命運嘅嘢就係咁有趣，隨着長大，星兒嘅身形變得修長，五官亦變得標致，因而引起其他人嘅注目，有朋友就問佢有冇興趣兼職做攝影模特兒，抱住好奇心之下，佢便開始攝影模特兒工作。當年佢對工作一無所知，因此撞過唔少板，好彩得到前輩提點，加上慢慢累積工作經驗，令佢提升唔少自信。
大學畢業後，模特兒事務所問佢有冇興趣轉做職業模特兒，佢當時心諗：「係喎！點解我唔索性全心投入呢個行業呢？」就咁樣，2009年正式成為模特兒界一員。按道理，新進模特兒一般會先喺攝影界打滾一段時間，先至會演出大型活動，只係對經驗已經相當豐富嘅星兒嚟講，最重要嘅反而係增加曝光率，因此當佢轉做職業模特兒後冇耐，事務所便安排佢以賽車女郎身份喺超級賽車冠軍賽上處女登場。
擁有迷人樣貌嘅崔星兒，本身已經夠晒吸引，配合性感嘅賽車女郎制服，更展現出玲瓏浮凸身材嘅魔力，尤其係豐滿嘅上圍，令呢位模界新星成為賽場上嘅焦點，同時成功打響名堂，瞬間成為網絡上嘅熱搜名字。翌年佢踩入車模界，以車模身份喺國際車展上登場，換上套裝後，雖然性感度降低，但卻展現出另一番女人味。及後，佢更紅到去外國，喺外國舉辦嘅車展中站台，呢個可以話係南韓車模嘅最高殊榮。
雖然崔星兒喺賽車女郎界及車模界都已經躋身一線位置，但佢卻從未放低攝影模特兒嘅工作，因此粉絲仍可以喺各大潮流、時裝及美容等雜誌上見到佢嘅身影。有趣嘅係按照南韓模特兒發展嘅套路，若然已經有相當人氣嘅話，好多時都會被事務所安排到演藝界發展，不過崔星兒卻一直跟演藝演出冇緣，唔通佢唔想擴闊搵銀空間？原來唔係佢對演藝工作冇興趣，係因為佢嘅工作量太多，根本分唔到身去做其他工作，而最重要嘅原因係佢對汽車有強烈嘅興趣，佢表示最愛參與賽車及車展嘅演出，事關前者可以滿足佢對速度上嘅追求，後者則可以見識到最新嘅車款，呢兩點喺其他工作上係畀唔到佢嘅。
簡介：只要睇過崔星兒嘅演出或寫真，都會被佢嘅美貌深深吸引，當然佢一副玲瓏浮凸嘅身材亦令人着迷，不論穿着任何衣服，都能穿出唔同味道。如此索模，係咪好令人心動呢？如果想了解佢多啲，就要Click入呢個網站喇！
網址：http://cafe.daum.net/model-star2
出生地：首爾
身高：173cm
三圍：34、23、33
撰文：魂