大凡溺水嘅人，求其見到附近有條稻草都當係救命符。好似壹傳媒老闆漢奸黎咁，最近周身唔掂，賣壹仔救亡搞到一波三折，隨時做契弟都做唔成，家陣最渴望嘅就係有人打救。咁啱得咁蹺，又真係有專業拯溺人士到訪喎。
可惜吖，此拯溺不同彼拯溺，肥佬捉實嗰件「人形大水泡」，並唔係咩白武士，而只係一個救生員，仲要係一個不務正業兼周身病痛嘅救生員，大家一定估到，講緊嘅係已經搣柴嘅前港九拯溺員工會發言人郭紹傑。正所謂江山易改，本性難移，雖然漢奸黎深受「莫財」之困，但搞搞震本色不改，最近一個星期頻頻喺自家大宅「宴客攪局」，主要係「搞事四人幫」成員同埋一眾老鴿嫩鴿等常客。尋日老鴿李永達帶住郭紹傑去到黎宅，密會近兩粒鐘至離去，你估當中有乜景轟？
係人都知，郭紹傑有兩樣嘢出名，一係發動救生員野貓式罷工，懶理泳客生命安全；一係佔中期間請病假走去擔任漢奸黎喺金鐘「皇座」嘅「私人保鏢」，周圍同人開拖，表現異常忠勇，護駕絕對有功。有人估郭紹傑今次到訪，有可能係向主人領賞，唔係冇道理o架，而漢奸黎念其忠勇，扔幾塊骨頭，派幾塊狗餅打賞吓都好應該。
當然喇，凡事都有代價，郭紹傑涉嫌呃病假兼違反公務員政治中立原則，高調參與政治，搞到神憎鬼厭，連佢所屬嘅黃絲工會都將佢掃地出門，為主子做嘢而犧牲，點都要搵主子哭訴吓，就算討唔到「安家費」，點都要撫慰一番。講真，漢奸黎被指係佔中幕後最大金主同埋搞手，又捲入連串政治黑金醜聞，新帳老帳遲早清算，有人步黃台仰後塵着草絕對唔出奇，反正郭紹傑做跟班保鏢駕輕就熟，又成日呻拯溺員人工待遇培訓樣樣差，此時正好過檔做漢奸黎家奴，省得浪費納稅人米飯。
所以話啫，物以類聚，人以群分，漢奸走狗成日連埋一齊講，乃係物理之必然。可能有人話，漢奸黎臭名遠揚，點解郭紹傑係都要不離不棄，忠心耿耿；係都要不避嫌疑，走去抱漢奸黎大腿？原因就係呢個世上，真係有逐臭之夫。
講到呢度，有一點可能好多人同功夫茶一樣諗極都唔明，郭紹傑涉嫌呃工傷病假兼違反政治中立，是但一條斷正都係「死罪」，當局話要徹查講咗好耐，但到依家都未有下文，擺明放生喇。唔怪得有人話，港府害怕外部勢力，漢奸屁股摸不得，連走狗尾巴也唔敢碰，睇吓郭紹傑至今仍然人模狗樣，咪一清二楚囉。