中國人荷包腫脹，全球各地都出現「爆買」大軍，就連廁所板都成為搶購對象，可惜吖，有時財神爺唔一定人見人愛，日本愛知縣某連鎖化妝品店，最近竟然喺門口張貼「中國人禁止入內」嘅告示。既然肥水流向別人田，熱臉反而貼着冷屁股，不如將財神爺留番喺國內好過。
呢嗱，國務院尋日公布，將調整部分消費品進口內地嘅關稅，其中部分嬰幼兒奶粉及所有種類嘅尿片，稅率更加一律降至零。至於其他獲減稅嘅產品就包括鮑魚、急凍魚蝦蟹、各式葡萄酒以及威士忌、化妝品同埋護膚品等等，共涉及一百八十七種貨品，平均稅率由百分之十七點三降至百分之七點七，種類之多，幅度之大，不可謂不驚人。
諗都諗到，只要進口貨價錢夠平，質素又有一定保證，好多人未必會長途跋涉專門出國掃貨。冇錯，中央降低消費品關稅，仲有好多政策考慮，例如國家同外國特別係美國貿易順差龐大，降低進口關稅有助紓緩嚟自美國佬嘅經貿壓力。但唔理點講都好，只要將消費力留住，自然可以一條龍帶旺飲食、服務等各個行業，從而刺激整個內需市場，條數都咪話唔襟計。
今次新政策同香港最息息相關嘅，莫過於奶粉同尿布實現零關稅，北區水貨生意會唔會被打殘，仲要睇過至知，但本報記者落區視察，發現一個二個水客玄壇咁嘅口面，就知道環境有幾惡劣。見到呢一幕，嗰班港獨分子一定最心涼，事關佢哋又光復又踢篋，無非都係要「中國人滾回去」，家陣求仁得仁，唔開心就假。
好心班友咪一味掛住自high喇。水貨客當中其實好大部分係香港人，佢哋飯碗被打爛，唔通你出錢養啊？同樣道理，個人遊喺驅蝗、鳩嗚等趕客鬧劇下買少見少，金舖珠寶店執完一間又一間，搞事分子都係「邀功」一輪後拍拍屁股，唔係旨意班廢青幫襯吓話！
當然喇，搞成今時今日咁嘅田地，港產官僚都要負好大責任。佢哋就好似英文所講嘅「尾巴搖狗」(the tail wags the dog)，一味跟隨搞事分子起舞，推出連串趕客政策，吸引新客源又苦無妙策，甚至連最簡單嘅邊境購物城都拖拖拉拉，家陣內地進口貨品關稅愈來愈低，各省市自貿區又大幹快上，搞得兩搞，分分鐘連最後一浸水都冇得食。
講到底，今時唔同往日，內地市場規模效應龐大，完全可以不假外求，當一套電影可以收幾十億，一個「雙十一」可以做千幾億生意，香港人繼續孤芳自賞，自高自大，聽食西北風都得嘞！