香港有出名嘅橋底炒蟹，亦有連外國人都嘖嘖稱奇嘅橋底打小人傳統，多得港府隻眼開隻眼閉，依家天橋底又成為黑幫開壇招收南亞兵團嘅據點，成個香港畀佢哋打橫行咁滯，其他人仲邊有碇企吖。
嗱，深水埗不嬲係南亞兵團其中一個「重鎮」，尤其係通州街天橋底長期被南亞兵團霸佔，吃睡拉撒唔在講，早前警方先至破獲武器庫同埋毒窟，簡直烏煙瘴氣。咪以為佢哋會知驚喎，話口未完啫，O記日前再喺上址拘捕四人，包括三名本地黑幫成員及一名南亞聲請漢，原來佢哋喺光天化日之下開壇舉行黑幫入會儀式，燒晒黃紙滴晒血嗰隻，問你服未。
喂，想當年黑幫再囂張，頂多都係話「夜晚十二點後我話事」啫，點諗到家陣進化到日光日白就開壇收o靚，當警察無到吖。咁當然，黑幫唔會計錯數嘅，搞咁大壇嘢，無非要南亞兵團誓死效忠，做佢哋嘅爛頭蟀，尋仇開片霸地盤只係小兒科咋，運毒販毒、打家劫舍食大茶飯先至係重頭戲，而且為咗乾手淨腳，黑幫仲會層層外判向「中介人」要人，就算出事都唔使上身，亦增加警方破案難度，結果搞到毒花毒草遍地開，香港淪為罪案淵藪就係咁解。
真係諗極唔明，天橋底明明係公家地，除咗警方，路政署、地政總署同埋食環署等衙門一樣有權執法，點知政出多門就變成權責不清，個個都側側膊唔多覺，搞到天橋底好似三不管咁款，簡直荒天下之大謬，話佢哋唔係欺善怕惡、蛇得就蛇都冇人信喇。唔係咩，食環署平時驅趕本地露宿者好勇武o架，點解對住南亞兵團就收晒火呢？港產官僚開口埋口違法就係違法，犯罪就係犯罪，擺出天王老子都冇面畀咁嘅樣，其實得個講字，見到兇神惡煞嘅南亞兵團縮都縮唔切至真。
有人就講得啱嘞，港府一味闊佬懶理，部門淨係識互相扯皮，今日黑幫就話喺橋底收o靚咋，他日容乜易變成橋底出大佬、橋底出梟雄o架，到時就喊都無謂咯。再講吖，咪以為橋底開壇、橋底開武器庫同埋橋底開毒窟已經夠晒猖獗，黑幫食髓知味咯喎，遲早出現埋橋底妓寨、橋底雞竇添呀。好明顯，南亞兵團呢個治安毒瘤已經呈尾大不掉之勢，當局仲唔做嘢，唔通真係要等佢哋殺埋入禮賓府先至知衰？
重要嘅事情要講三次，咁就唔該政府部門快啲做嘢、做嘢、做嘢。講到尾，徹底斬斷南亞假難民來港誘因先至係關鍵，惟有退出難民公約，最低限度重設禁閉營，香港先至有撥亂反正嘅希望，否則講乜都係嘥氣嘅咋。