咪睇今時今日女權高漲，其實面對性侵事件，女性受害人要作出舉報，一樣需要好大勇氣，尤其中國人地方有所謂家醜不外揚嘅傳統，往往令受害人卻步，所以港隊跨欄運動員呂麗瑤勇敢自揭性侵經歷，真係好值得大家掌聲支持o架。
剛過二十三歲生日嘅呂麗瑤係港隊女子跨欄金牌選手，亦係田徑界嘅明日之星，佢今次自爆約十年前遭前教練性侵嘅不幸往事，一嘢震撼全城，唔止佢當年嘅母校發聲明力挺，體育界給予支持，就連特首林鄭月娥及保安局局長李家超都大讚小妮子勇氣可嘉，警方尋日仲主動去學校了解添。
冇錯，性侵事件不容姑息，色狼必須得到懲罰，受害人必須受到保護同尊重，但華人社會普遍對性忌諱，覺得羞於啟齒。正如呂麗瑤話齋，希望透過自身經歷，鼓勵更多受害人勇敢站出來，令性議題唔再被認為係尷尬或羞恥。咁又係呀，受害人嘅沉默唔會換來加害者嘅仁慈，反而只會令加害者變本加厲，無形中製造更多受害人。呢，就連代表業界嘅立法會議員都話收到匿名投訴，證明事件只係冰山一角咋。
不過話時話，今次事件之所以引起社會廣泛關注，好大程度係因為受害人係體壇明星，名人效應之下，就連港府高官都要出聲表態，如果換轉受害人只係一個寂寂無聞嘅普通人，你估特首及一眾官員又會唔會七情上面咁話對事件感到傷心呢？社會名人又會唔會爭相表示零容忍呢？大家心照喇。
講真，性侵事件存在於社會各階層，受害嘅點止體育界呀。就講學校吖，淫師往往利用學生對自己嘅信任犯案，簡直係賤中之賤，卑劣之最，必須嚴懲不貸。可惜吖，學界話就話零容忍咋，其實校譽大過天，好多時都係私下要求淫師辭職就算，大事化無。就算今次事件搞到沸沸揚揚，有關學校都係將涉事教練停職了事，教育局更係一味耍官腔，如果話咁都唔係姑息養奸，講都冇人信喇。
講到尾，最離譜都係港府，家陣係就係設有「性罪行定罪紀錄查核機制」，弊在漏洞多多，當局更往往以私隱做擋箭牌包庇孌童犯，加上查核機制為自願性質，僱主唔可以強制查詢準僱員嘅紀錄，就算係都只限於查核新僱員，有機制等於冇機制，有監督等於冇監督，根本起唔到阻嚇作用，有人話港府係淫師保護傘，真係冇講錯(口架)。
嗱，李家超尋日被記者問起會唔會將查核機制改為強制性質，佢就不置可否，淨係話會交由法律改革委員會研究同檢討喎。會唔會研究完就冇咗件事，檢討完就冇晒下文，大家(目及)實嘞。