中環出更：楊偉雄甩轆 噏錯自己係立會議員
創新及科技局（創科局）尋日終獲立法會財務委員會通過撥款，將於本月二十日成立。盛傳將出任局長嘅特首創新及科技顧問、行政會議成員楊偉雄，尋日朝出席一個活動時就被問及成立創科局事宜，但佢竟先後三度「甩轆」，將自己嘅行會成員銜頭錯講做立法會議員，唔通佢想做立法會多啲？
演講一度「失聲」
楊偉雄話，政府並非首次創立新政策局，而佢作為立法會議員（正確應為行政會議成員）已有做相關工作，並會與議員溝通，強調自己並非對某一個政治立場或製造好多拗撬，只想做對香港好嘅事，又話呢個係佢做立法會議員嘅做法。當被問到係咪願意出任創科局局長時，佢就話一直想為香港做事，「我依家做立法會議員同創新及科技顧問都係為咗咁樣」。
其後楊偉雄為活動致詞時，發生了一段小插曲，佢疑誤觸按鈕令投影機螢幕升高及將咪高峰關掉，搞咗半分鐘都搞唔好，只好繼續演講，要靠工作人員用兩三分鐘才能復原。其實楊偉雄唔識操作投影機及咪高峰都唔緊要嘅，因為呢啲都唔算係創新科技嘛。
卓妮