內地有句諷刺官場黑暗嘅順口溜︰「不查處處鮮花，一查全是豆腐渣。」呢句說話用嚟形容澳門一樣貼切。咪睇當地表面一片歌舞昇平，實際上藏污納垢，臭不可聞，「衰過清朝」絕對唔係浪得虛名！
話口未完又嚟喇。強颱風「天鴿」八月重創澳門，期間除咗造成嚴重人命傷亡，亦吹冧唔少大樹，點知眨吓眼過咗近四個月，市區仍然有大批塌樹未被清理，唔知嘅仲以為啱啱打完仗。唔好同我講澳產官僚想學廣島咁保留原爆遺址，照辦煮碗整番個「天鴿風災紀念公園」，開放畀遊客憑弔吖。
喂，清理塌樹啫，又唔係製作登月火箭，咁都拖拖拉拉，簡直荒天下之大謬。就算真係好似當局咁講，塌樹冇對鄰近樓宇及擋土牆造成損壞，風災都過咗咁耐喇，工作優次排到幾後都搞掂，冇可能等到依家至補鑊！不過話又講番轉頭，澳產官僚出名質素低能力差，清理塌樹對佢哋嚟講，難度分分鐘同整火箭差唔多。早排網上流傳一條短片，多名澳門警員對住馬路上倒塌嘅大樹束手無策，有人居然上演真人版「刀仔鋸大樹」，結果畀網民笑到面黃。
常言道，一滴水睇穿整個世界，一棵樹亦足以揭示澳門繁華背後嘅污糟邋遢。好似早排海關人員將六名無辜旅客無理扣查嗰單畸士，當局話就話交畀檢察部門調查，但到依家仲死撐部門「依法辦事」，擺明官官相護。仲有海關今年七月兩次倒掛五星旗，高層開頭賴照片「移花接木」，到後來冇得賴就玩拖字訣，結果又係高高舉起，輕輕放下，涉事人員罰款了事，問你服未。
成日話港產官僚係四方木，唔踢唔郁，查實呢方面澳產官僚有過之而無不及。巴黎人酒店四月爆發退伍軍人症，衞生當局做完一輪清潔消毒騷，結果事隔半年有多，酒店供水系統仲係含有惡菌，話口未完當地又爆多宗新個案。最過分嘅係，當局三日後至施施然去患者住處抽水化驗，等結果又要等兩個星期，急驚風遇着慢郎中，你話係咪靠害吖！
當然喇，呢啲只係澳門亂象嘅冰山一角。唔講其他，淨係起間離島醫院已經黑幕重重，儼然現代版《官場現形記》。嚴重延誤超支唔在講，本報調查後發現，有關工程冇經招標直接批畀單一建築設計公司，而呢間公司唔單止包攬多個政府Project，素有「御用則師」之稱，負責人更身兼行政會委員，利益衝突甚至利益輸送嫌疑濃得化不開，會唔會出現「歐文龍第二」，真係冇人敢寫包單。
領導人三令五申，要求一國兩制實踐不變形、不走樣，可惜事與願違，香港固然亂象叢生，澳門亦係烏煙瘴氣，唔通真係敬酒唔飲飲罰酒，係要激到阿爺行「一國一制」至安樂？