有位大明星曾經講過，排遣寂寞嘅最佳方法係買張機票飛去倫敦，喺廣場餵一個下晝白鴿，跟手搭當晚夜機返港，可惜現實生活中唔係人人都好似大明星咁有閒情逸致，無事無幹遊飛機河，行程大失預算兼費時失事，你估真係貪過癮咩！
本報收到讀者報料，佢個女前日乘搭國泰一班由日本札幌飛返香港嘅航班，原定航程五個多小時，點知起飛後失驚無神轉飛台北，由另一批機組人員接更返港，連累全機三百多名乘客行程延誤兩個幾鐘頭。
國泰解畫，話涉事航班嘅機組人員因為工作時間超出民航處指引上限，所以要轉飛台北，並安排另一組由本港出發嘅機組人員到當地接更。之不過工會方面踢爆，涉事航線飛行時間長，機組人員工作時間相當「忟水」，一旦有乜差池要喺日本留宿，公司又要多一筆使費。唔使問阿貴，國泰又係諗縮數，一味慳得就慳，至於乘客被當人球亂咁舞，引起不便，當然係閣下自理喇。
喂，你話航班因為天氣等不可抗因素更改路線就話啫，機組人員工作時數，航空公司有晒紀錄，點解唔安排其他人員起飛？嚟緊聖誕新年係出遊旺季，超時工作問題只會有增無減，類似事故點知會唔會陸續有來？唔理點都好，一手交錢，一手交貨，乘客既然真金白銀付出，冇義務「理解」航空公司有咩「苦衷」。正如苦主話齋，買得直航就係貪舒適，轉來轉去，不如買廉航冇咁嬲。
冇錯喇，國泰出名服務差劣店大欺客，只求自己就手，懶理乘客感受。除咗亂改航線，為求賺到盡不惜超賣機票亦係搞到天怒人怨，乘客慘被賣豬仔，淪為機場難民可謂家常便飯。話明「店大欺客」，梗係揀人嚟恰。前立法會議員劉慧卿早前搭國泰機飛以色列，點知因為航班突然取消而滯留當地，結果國泰極速跪低，賠錢息事寧人，擺到明欺軟怕硬。所以話，旅客幫襯國泰，遇到問題一定要出聲，其中當然唔少得第一時間搵本報幫手喇。
講開又講，國泰服務不斷插水，低處未算低，淨係航班延誤已經夠趕客。有國際機構比較數據後發現，上月國泰每十班航班最少兩班delay，準點率全球一百開外；全資附屬嘅國泰港龍仲衰，十班機有三班遲，全球排一百二十九，問你怕未！
群眾眼睛係雪亮嘅。家陣一提起「因航」，大家就知係「因管理不善在全球最佳航空公司排名榜中節節下跌嘅國泰航空」嘅簡稱。精明消費者唔想貼錢買難受，自己識得揀喇！