屋漏偏逢連夜雨，船遲又遇當頭風。正值本港旅業吊鹽水之際，又發生內地團友同導遊爭執受傷醜聞，仲要一日發生兩宗，簡直死多幾錢重！
尋日朝早十一點幾，兩名跟團湖南旅客被安排到尖沙咀購物，期間懷疑因為購物問題同女導遊發生爭執，有人報稱被男團友圍毆，搞到要驚動警方；事隔半個鐘頭，另一團人喺購物期間，又係懷疑因為有人拒絕購物，結果遭襲擊送院。類似情節熟口熟面，唔使問阿貴，幾乎可以肯定涉及低團費問題。一邊係無所不用其極收人成團，為收回成本，威逼利誘自然在所不惜；另一邊冇你咁好氣，一於企硬撳實荷包，有咩法子唔出事？寫定包單都得嘞，低團費一日存在，同類事件永遠無法杜絕。
唔理點都好，醜聞傳番去內地，肯定會進一步坐實香港劏客、趕客天堂嘅惡名。今時唔同往日，隨着內地進一步調低進口消費品關稅，當中奶粉同尿片等更實行零關稅，再加上內地自貿區不斷擴大，民眾買進口貨愈來愈便利，就算真係要出境「爆買」都唔一定嚟香港。好似日本咁，啱啱就宣布進一步放寬消費稅退稅規定，有錢你怕冇地方消費咩。你話嘞，喺咁嘅風頭火勢之下，香港再傳強迫購物醜聞，同為淵驅魚，為叢驅雀有咩分別。
話時話，上述亂象可以講係本港旅業嘅頑疾，周而復始，沒完沒了，耐唔耐就爆一劑，淨係今年頭九個月，旅遊事務署就接獲六宗內地團作出嘅滋擾投訴，遠超舊年全年數字。最離譜嘅係，連業界都承認齋靠自我監管解決唔到問題，N年前已經呼籲港府成立有調查同執法權嘅旅監局，可惜你急官老爺一味歎慢板，拖到最近至話計劃掟相關條例草案上立法會。以今時今日嘅政治氛圍，反對派係又拉布唔係又狙擊，等到旅監局真係成立，蚊都瞓蛇都死。
見微知著，港產官僚從來都係自我感覺良好，少少危機意識都冇，面對內地不斷調低消費品關稅，旅遊同零售業雪上加霜，港產官僚老神在在，不以為意，唔係話睇唔到有咩影響，就係唱高調，簡直唔知「死」字點寫。當年鬍鬚曾滋油淡定，話香港旅遊會展業優勢「唔係膚淺」，「無懼競爭」，嗰種堅離地作風，港產官僚十幾年來始終如一。
大家有眼睇，港產官僚遏止旅業亂象不力，吸引新客源無方，一味等運到。最慘係隨住近年中港矛盾不斷升溫，港府無力疏導不特止，反而隨着搞事者起舞，一時限奶令，一時一周一行，連做開嗰班客都趕走埋。本港「四大支柱」，旅遊業呢一碌睇怕都唔捱得幾耐！