開講有話︰「看人不能看臉皮，看書不能看封面。」好似隔籬梳打埠咁，咪睇表面歌舞昇平人人有錢派，實際政府管治以至官僚質素要幾低劣有幾低劣，冇帶個腦返工有之，不分是非黑白有之，淨係一個海關，醜聞已經多到天光都數唔完，正式係「表面風光，內裏陰乾」！
今年七月，澳門海關接連爆出兩宗倒掛五星旗事件，本來有錯就要認，打就要企定，點知當局卸得就卸，居然賴相片係「移花接木」，後來司警查清查楚，惟有改口承認對海關連番出錯不能接受，又話會嚴肅處理，之不過好快就當冇件事，拖吓拖吓，到依家足足過咗四個幾月，調查工作都仲未完成，話就話商討緊處分方案，都唔知係咪繼續玩拖字訣嘅啫。
有人就講得啱嘞，海關官僚做嘢求求其其，是是但但，連五星旗都可以掛錯，仲要連錯兩次，搵個阿嬸返嚟做好過嘥人工養佢哋。嗱，咪以為小事一宗，根據國際慣例，倒掛自家國旗，通常代表國家發生重大災難，又或者向來敵投降。你知喇，海關地位敏感，萬一畀外部勢力滲透，絕對唔講得笑，唔該澳門當局徹查到底，咪諗住搵個前線祭旗就當交差吖！
話時話，海關醜聞多多，倒掛五星旗只係冰山一角咋。本報接獲投訴，七名港人日前喺澳門外港碼頭準備搭船返港，排排吓隊其中一人懷疑被蠱惑仔挑釁並投訴打尖，雙方一度發生推撞，點知三名關員到場後唔係扣查爭執雙方，而係不由分說將全團人扣查，結果其他無辜人士前前後後被擾攘近兩粒鐘至返到香港。要知道團員中不乏醫學界頂尖人士，萬一有排緊隊做大手術嘅病人被延誤，呢隻鑊澳門海關孭唔起o架！
一滴水睇穿整個世界，小小一單旅客糾紛都搞到一鑊泡，成個澳門政府危機處理能力之低，不問可知。今年八月強颱風「天鴿」襲澳，氣象部門反應後知後覺，搞到七國咁亂，民怨沸騰，事後揭發原來局長打風期間安坐家中，上網決定係咪掛風球，夠離譜喇啩？未算，呢位仁兄災後以私人理由請辭，冇幾耐竟然翻閹公務員職位，高薪照逗直到咬長糧退休為止。至於風災善後工作，更加係有口皆悲，部分地區斷水斷電，生活必需品出現炒風，仲衰過第三世界地區。「天鴿」吹襲粵、港、澳三地，唯獨澳門政府搞到一褲都係，劣質管治水平，一次過露晒餡。
講起都可悲，香港同澳門特區呢對難兄難弟，一個頂心杉，一個愚且魯，兩個都唔爭氣，仲話成功落實一國兩制，嘥氣喇！