撐「拉布」人士喺立法會外紮營，得嗰小貓三、四隻，結果「示威」變「示弱」，警方三兩下手勢成功清場。可惜吖，面對南亞假難民喺深水埗天橋底安營紮寨，港產官僚視而不見，見而不理，相關六個衙門你推我讓，互相推莊，天橋底淪為好似葛咸城嘅化外之地，問你死未！
前排有黑幫公然喺深水埗通州街天橋底舉行入會儀式，「燒黃紙、斬雞頭」招收南亞假難民新血，不法分子囂張成咁，就係睇穿政府部門有法不依，形同鵪鶉。正如東方報業集團旗下「ontv東網電視」時事評論節目《阿王辣爆》主持人王國興話齋，呢批來自越南、印度、巴基斯坦及尼泊爾等地嘅假難民唔單止鵲巢鳩佔，好似攞正牌咁搭建二百間「屋仔」，部分更成為「雞竇」等賣淫場所，一班黑底假難民參與各種犯罪活動，打交、打劫、械鬥、搶地盤樣樣齊；最慘係呢顆治安大毒瘤喺全港不斷擴散，搞到七國咁亂，烏煙瘴氣，市民真係多得佢哋唔少。
之所以搞成今日咁，全因為民政、食環、地政、康文、社署等六大衙門扯皮推諉，多人管即係冇人管。以前九龍城寨就話英國佬、港英政府同中國政府「三不管」，估唔到九七年後歷史居然重演，都咪話唔諷刺。
橋底假難民成為部門之間嘅燙手山芋，講真一啲都唔出奇。港產官僚某程度同賊佬差唔多，都係取易不取難，欺善怕惡，驅趕老弱無牌小販或者拾荒婦，就話輕輕鬆鬆逞官威啫，假難民五大三粗，斬起人上嚟，警察開槍都撳唔住，絕對唔講得笑，仲話執法喎，街頭見到都扮盲運街尾走啦，吓話！
再講吖，港產官僚一向奉行「少做少錯唔做唔錯」，特別係高層都隻眼開隻眼閉，關人個關，班細嘅又點會皇帝唔急太監急，自找麻煩咁笨呢。大家有眼見，包括本報在內嘅社會各界不斷要求港府退出國際難民公約，並重設禁閉營，最低限度對犯刑事罪嘅假難民即捕即解，點知港府當耳邊風，頂多加快難民甄別程序，敷衍吓公眾。講過好多次喇，一日唔徹底杜絕假難民來港搵食誘因，就算審批程序再快，都係同抱薪救火冇乜分別。
港府成日怕人權鬥士同政客說三道四，但連一向高舉人權自由大旗嘅歐洲都不得不向現實低頭，收緊移民政策；特朗普嘅「禁穆令」最終亦獲聯邦大法官開綠燈，唔通人哋就冇人權鬥士同政客？始終都係嗰句，對罪犯仁慈即係對民眾殘忍，有人話港府縱容假難民禍港係千古罪人，一啲都冇講錯！