香港成為「長壽之都」，人口持續老化，政府在安老政策上卻一味推卸責任，在庫房年年水浸下，係都唔肯推行全民退休保障，搞到生活在貧窮線下嘅老人家好不淒涼，「壽則多辱」成為他們的寫照。另一方面，香港的生育率這幾十年來都偏低，資料顯示，一九七九年平均每名女性生產二點一名嬰兒，但到近年已跌至平均生產一點二名嬰兒。換言之，即使肯生育，也是「一個夠晒數」。
不久前的《經濟學人》指出，南韓二○一七年平均生育率只有一點○五，成為全球生育率最低的國家，儘管政府投入巨資以獎勵措施鼓勵生育，但依然未能提高生育率。新加坡為了鼓勵民眾「生產報國」，亦祭出一系列的獎勵生育措施，例如生育補助金、國宅優先配給權、男性可享有長達兩周的強制帶薪育嬰假等，但同樣未能鼓勵夫婦多生育以改善人口老化問題。
至於香港，前行政長官曾蔭權曾廢噏叫人「至少生三個」，如今政府拍宣傳片，從早年人口激增時的「兩個已經夠晒數」，改為鼓勵市民「湊夠數參加籃球隊」，真係唔經大腦，堅離地！不過，冇神經政府冇話「湊夠一隊足球隊」，只係叫你哋生五個啫，總算有一、兩條神經未廢！
呢，早前有調查話二十至三十九歲青年對生兒育女多表示怕怕，有兩成明確表示不打算生育。其實，即使不研究調查，多數都會知道養兒育女開支大，尤其是房屋問題，更令年輕夫妻唔想生育下一代，加上責任大、社會環境等因素，正所謂「養得佢大又怕佢變壞」，何況政府即使承諾研究法定產假由十周增至十四周，男士侍產假由三天增至五天，小恩小惠就想鼓勵年輕夫婦多生育？如果咁都掂，南韓、新加坡就唔使咁頭痕啦！鼓勵正常生育以挽救人口老化，政府有責，可惜香港在人口政策上交了白卷。