本月初剛生效的「四電一腦」循環再造徵費，可以說是環境局局長黃錦星的劣政之一，新例推行一個多星期以來，評論口誅筆伐、市民怨聲連連，之不過，港產官僚從不會謙虛檢討，至叻就係文過飾非，將錯就錯，好官我自為之。
市民有目共睹，黃錦星歷經兩屆政府，為環保做咗啲乜嘢貢獻？事實是香港的空氣污染依然嚴重；未知佢有冇「橋」透過徵費令空氣清新啲，譬如馬路旁植多兩棵樹而向市民徵收「植樹綠化清新空氣費」？巧立名目，只要隔三差五祭出「環保」呢面大旗，就可光明正大向市民嘅錢包打主意：膠袋徵費、四電一腦循環再造費、垃圾徵費等一大堆新徵費法例，真係如繁星點點，叫人難以一一去數清楚。
講番「四電一腦」呢條新例，市民未見其利先蒙其害，皆因政府向每件舊電器徵收十五至一百六十五元的循環再造費，電器商當然唔會硬啃，最後還不是把成本轉嫁給消費者。黃錦星拍晒心口話「相信回收商有能力在消費者買新電器後三天收回舊電器」，而實情係有些拖咗成個星期都未曾回收；嗱！即使真係三日內回收，試問有幾多家庭可以同時擺放新舊兩部洗衣機或雪櫃啊？即使擺到都拮眼，你話咁仲唔係擾民？佢仲話，就算市民自己搵收買佬搬走電器，法例上雖冇禁止，不過佢表示反對，理由係收買佬最後胡亂拆解，破壞環境，這是大家不想看到也不應該做的。
阿哥，你估啲收買佬好似星爺你咁得閒咩！佢哋用真金白銀收買舊電器，唔賺錢嘅工序根本唔會做，點會「胡亂拆解」？有力冇碇出乎？局長，好心你唔好咁堅離地啦！古人說：履不必同，期於適足；治不必同，期於利民。好多嘢唔係盲目偷外國嘅制度就掂o架！偷「橋」有時要顧及實際情況，唔好一味諗啲屎橋出來亂咁徵費，對環保全然不起作用，落得假環保而真擾民之罵名乃咎由自取。