中環出更：兒時燒炮仗炸傷手 黃均瑜嘆新年氣氛不再
舊時過年過節，每家每戶都充滿喜慶色彩，家人朋友相聚，加上各式各樣應節嘅食品，滿滿嘅過節氣氛，但依家嘅氣氛似乎已經好唔同，無論中秋定新年氣氛都非常冷清，卓妮喺農曆新年期間，見到香港教育工作者聯會會長黃均瑜同太太，黃就憶起細個過年嘅趣事，原來佢六歲第一次燒炮仗就炸傷手嘞！
黃均瑜話，細個過年真係開心好多，因為以前家庭觀念強好多，依家就淡薄啲，今年受到新冠肺炎嘅影響，就更加唔使拜年添！佢話細個過年一定會燒炮仗，六歲嗰年第一次玩就因為點着咗揼唔切，搞到炸傷手指，不過好彩冇乜大礙，之後就知道要小心嘞！佢又話以往炮仗真係家家都有，係過年必備，但依家就可能中西節日多咗，幾乎每個月都有節日，大家當放假咁，自然冇乜嘢氣氛咁話。
吳傑莊懷念同親戚玩魚蝦蟹
世界華商聯合促進會青年委員會主席吳傑莊（Johnny），佢話喺佢嘅年代已經冇得燒炮仗喇，但就會同一班表兄弟姊妹圍埋一齊玩魚蝦蟹，仲話麻雀只可四個人玩，呢個就可以成班人一齊玩，開心好多！Johnny又話細個過新年，因為嫲嫲住長洲，仲會一家人早一晚返去包湯圓㗎，不過依家老人家走埋，都冇乜人喺嗰度，就冇入去過年喇！
劉燊濤話電子拜年難免疏離
轉個頭就見到香港表廠商會常務副會長劉燊濤（Gary）同太太，Gary就話新年主要會同屋企人過，媽媽、細佬、太太同埋小朋友一齊，但係竟然話唔講完全唔知係過年添呀，真係陰功囉！Gary又感嘆細個嗰時啲節日氣氛真係濃厚好多，依家就因為電話方便好多，可以直接電子拜年，唔一定要見面，難免令大家關係變得疏離。
卓妮