問君能有幾多愁，恰似港官卸膊面皮厚。造價近千億元嘅沙中線工程醜聞愈揭愈臭，奇就奇在港鐵高層都要起身走人，偏偏監管不力嘅港官就唔使問責落台。正如「東方報業民意調查」顯示，受訪者一面倒鬧爆港府官官相護，問責制蕩然無存，醜聞肯定陸續有來。
提起沙中線，醜聞真係數天光都數唔完。港鐵高層呢頭為紅磡站「剪筋」醜聞冇得留低，嗰頭土瓜灣站就爆出周邊有廿三幢樓宇沉降超標，會展站又有十四處沉降超出警戒線，連地底水管都變形，簡直沒有最醜，只有更醜。坦白從寬，抗拒從嚴，有立法會議員要求港鐵交代沙中線各站情況，包括沉降數據，仲有冇剪短鋼筋造假，以釋除公眾疑慮。咁又係呀，繼續瞞上欺下，吞吞吐吐，咪使旨意挽回公眾信心咯。
話時話，呢項由前特首曾蔭權爵士提出嘅十大基建，市民已經冇晒信心。自從本報率先踢爆紅磡站地底鐵路隧道出現滲水，醜聞就好似井噴式咁大爆發，紅磡站剪筋喇、會展站工字鐵不足喇、土瓜灣站削牆喇……話係豆腐渣工程都冇冤枉。最弊係港府唔止監管失職，港鐵仲死撐結構安全，即係攞市民安全較飛啫。
大家有眼睇，港府身為港鐵大股東，港鐵管理層又係由港府任命，仲要擺四個政府代表入去董事局，點知大鑊一樣爆完又爆，港鐵儼然土皇帝咁款，證明監管形同虛設。好嘞，直到事件瞞無可瞞、避無可避，港府就求其搵幾件港鐵高層祭旗，偏偏負責監管嘅運房局就乜事都冇，擺明推卸責任、轉移視線啫，唔怪得有人話林鄭包庇護短喇。淨係講最應該問責落台嗰個陳帆局長吖，唔止厚顏留任，仲話「睇報道至知」，咁不如由記者坐埋局長個位啦，納稅人使乜嘥錢養廢官喎。
講到底，港產官僚無能已經係人所共知嘅事實，醜聞爆發以來，涉事嘅「大判」禮頓從未就事件解畫，港官完全冇符。之所以奈禮頓唔何，一來呢間洋公司手握數百億元政府工程合約，大到不能倒，港府咪投鼠忌器囉；二來港官「恐洋」、「怕鬼」心理作怪，聽到洋人兩個字就發軟蹄，林鄭咪只敢怒炒港鐵高層，唔敢對洋人問責囉。
正所謂，一粒沙看世界。香港唔止沙中線工程出現大面積沉降，就連特區政府嘅管治都全面沉淪。林鄭雖然外號「好打得」，但對住洋人同失職下屬就現晒形，唔敢揸正嚟做，正一銀樣鑞槍頭。再咁落去，港鐵自毀招牌事小，沙中線通車無期、香港競爭力消失殆盡事大吖。