跛腳鴨政府豈止流年不利，直頭係撞邪！「曾商勾結」愈揭愈臭，煲呔曾窮途末路注定臨尾香唔在講，連港產豆腐渣工程嘅陳年爛帳，都因為埋唔到尾衰多鑊，呢啲咪叫衰開有條路囉！
仲記得爆出短樁醜聞嘅天水圍天頌苑嗎？原來鬧劇未完，仲不斷上演「續集」添。當局用咗幾億元補鑊，諗住將涉事嘅兩棟樓賣出，點知先後因為停售居屋同業主委員會申請釘契，呢批居屋拖咗十幾年都未甩手，依家仍然係「待售吉樓」。
屋漏偏逢連夜雨，近排屋苑再次出現疑似不平均沉降，加上同業主委員會就管理費問題嘅爭拗未停火，據講房屋署做咗一輪評估，但拆唔掂，焗住要無限期押後兩幢居屋超過八百個單位嘅出售計劃，一於將個波踢畀下屆政府。公屋聯會負責人講得啱，當局將單位空置十幾年都未完成居屋銷售計劃，完全係不負責任！
冇錯，天頌苑短樁醜聞簡直就係政府部門監管甩漏，官商關係唔清唔楚，高官卸責瞞天過海，納稅人睇見都眼冤嘅驚世「傑作」。除咗補樁加固同大型維修無啦啦使多二億幾公帑，法律費、賠償準買家訂金同利息嘅開支，加埋延遲出售造成嘅損失，五年前已經高達六億幾，依家更加係天文數字。家陣樓價高企，幾多無殼蝸牛望樓興嘆，當局有樓卻賣唔出，你話係咪荒謬吖。
煲呔曾上台七年乜都唔做，短樁居屋出售一拖再拖，兩幢豆腐渣工程生招牌咁戙喺度丟人現眼，煲呔曾過幾個月就拍拍屁股走人，留低個無底黑洞繼續吞噬民脂民膏，簡直豈有此理。
最離譜就係，煲呔曾自己唔做嘢不特止，仲公然包庇護短，冒天下之大不韙，向當年因涉及短樁醜聞成為千夫所指、被立法會破天荒通過不信任動議嘅前房屋署署長苗學禮派荷蘭水蓋，頒授銀紫荊星章，荒唐到冇朋友。
查實，除咗涉事高官輕易過骨而且因禍得福，呢單回歸以來房屋工程最大醜聞仲有好多怪雞嘢。嗱，事件中雖然先後有多人被廉署控告，但只有兩名低層質控監督人員受到法律制裁，令人覺得成件事嘅處理又係高高舉起，輕輕放下。
冇計喇，法之不行，自上犯之，香港官場愈來愈烏煙瘴氣，亂七八糟，就係因為上樑不正下樑歪。最典型就係煲呔曾，身為特區阿一，竟然同富豪海陸空全方位親密接觸，黐飲黐食，佢居然噏得出「問心無愧」，唔到你唔服。計功夫茶話齋，高官不避瓜李之嫌同富商勾勾搭搭，基層官員更加唔會將徇私舞弊當一回事。官場誠信「短樁」，官員道德沉降，香港遲早冧檔。