誠信有幾重要？呢一個問題不單止影響捲入僭建醜聞嘅特首參選人唐英年，同時影響香港嘅整體形象。你知啦，一個人誠信破產最多身敗名裂啫，萬一成個香港誠信破產，咁就好鬼死大鑊！
功夫茶要講嘅係，香港黑店特別多，多到必有一間喺左近。所謂黑店，即係待客之道毫無誠信可言，千方百計將顧客好似羊牯一樣劏到血淋淋。
呢嗱嗱嗱，消費者委員會公布咗四間售賣偽冒藥物嘅黑店，包括位於銅鑼灣波斯富街嘅富康中西大藥房，位於銅鑼灣景隆街嘅崇高大藥房，位於灣仔堅拿道西嘅高寶藥坊，以及位於土瓜灣落山道嘅海彬中西藥行。四間藥房都涉及售賣偽冒嘅「犀利士」，負責人唔係罰款或者社會服務就係判監四個月，問你怕未。
另外咯喎，商務及經濟發展局局長蘇錦樑表示，過去三年海關對參茸海味店巡查過一千九百幾次，提出九次檢控。上月成功檢控兩名售賣乾鮑嘅小販，劏客手法包括遮蓋價錢牌上面嘅計價單位，意圖混淆斤両欺騙消費者，分別被判罰款五千及二千元。蘇錦樑係咁講嘅，海關會密切留意巿場狀況，有需要會加強對不良商戶採取針對性行動。
黑店唔止咁少o架，連美容纖體服務都宰客成風。消委會早前點名一間美容院以不良銷售手法欺騙顧客，涉及款項八百五十萬元。
香港號稱購物天堂，因乜事幹淪落到黑店無處不在？原因就係蘇錦樑都冇乜誠信，話就話加強對不良商戶採取針對性行動，實際上咯喎，根本係放軟手腳任由奸商為所欲為。喂，現行《商品說明條例》漏洞好大o架，涵蓋範圍只係包括商品銷售，冇針對提供服務嘅行業，美容纖體服務等等就有機會鑽空子嘞。
既然條例有漏洞，當然應該堵塞啦。可惜吖，官僚主義拖得就拖，政府本來決定修改《商品說明條例》，建議將不良銷售手法納入刑事檢控範圍，並且加入售後七天冷靜期。有關條例前年十月已經完成公眾諮詢，點不知過咗一年有多，至今仍然未向立法會提交修訂草案。最騎呢嘅係，商務及經濟發展局不久前宣布押後處理引入七天冷靜期，話商界反彈太大喎，所以要留待日後分拆處理咁講。
呢家嘢咪就係助紂為虐囉，淨係顧及商界反應，毫不關心羊牯感受。你明知老虎食人，你又明知一碌棍冇辦法摳得死一隻老虎，點解你唔去搵一支槍砰一聲打死嗰隻食人嘅畜牲呢？
蘇錦樑啊蘇錦樑，誠信真係好重要o架，一身蟻嘅唐唐有辦你睇啦，如果閣下講咗打擊黑店而又冇付諸實行，官運冇可能亨通o架咋！