林瘋笑傲新秀賽

因「林瘋」熱潮而成為新秀賽焦點嘅林書豪，尋日可謂令球迷大失所望，皆因佢為了爭取休息時間，主動要求教練奧尼爾讓佢在新秀賽「打少啲」：「紐約人在近二十日內打了十四場比賽，我實在唔想連續地作客比賽，我在各方面都感到很疲累，希望在明星賽期間盡量爭取休息。」

艾榮轟34分膺MVP

結果林書豪尋日只係為奧尼爾隊上陣了九分鐘，出場時間全場最低，僅得兩分及一次助攻。不過J.Lin「Hea打」反而更凸顯佢嘅星級地位，有美傳媒指出，近年不少極速上位嘅新星大多唔在新秀賽認真，好似近兩年都有出席新秀賽嘅「入樽王」格芬，就連續兩年「Hea打」，尋日亦只係上陣十一分鐘而已；至於「毒玫瑰」戴歷羅斯在○九年同樣玩「Hea打」，當時入四分就收工。

賽前獲安排記招，書豪擁有巨星級待遇。（法新社圖片）	艾榮勇奪ＭＶＰ，不過人氣遠遠不及阿豪。（法新社圖片）	奧尼爾隊的馬基夫摩利士（左）如飛將軍阻止對手投籃。（法新社圖片）

不過未出名嘅新星，當然要在新秀賽爭表現上位，今季狀元爺艾榮今場三分球八射八中，攻入全場最高卅四分及交出九次助攻，協助巴克利隊以146比133擊敗奧尼爾隊之餘，自己亦攞埋新秀賽MVP。

賽前開記招 星級排場

可惜艾榮如何努力，風頭依然被J.Lin搶盡，據悉新秀賽比賽期間，最多球迷喊嘅口號就係「We want Lin！」（我們想林書豪落場），而記者嘅目光亦落晒喺J.Lin身上，就如賽前嘅明星賽記者會，有份出席嘅「甜瓜」安東尼頭五條問題都係被人問及有關林書豪嘅嘢；至於NBA官方亦特意在賽前為J.Lin開單人記者會，此前就只有總裁史端做過。難怪J.Lin「同居密友」菲爾斯出席新秀賽時，都扮睇林書豪做封面嘅《時代雜誌》，借「林瘋」搶鏡。

新秀賽戰果

奧尼爾隊 133:146 巴克利隊

本報綜合報道