綜援制度受挑戰　皆因社署太僵化

功夫茶咁開心，唔通唐英年終於宣布退選特首？如果係就一天光晒，「謊唐」僭建，搞到醜聞纏身、誠信破產，早就應該自動消失喇。可惜吖，唐唐唔止冇膊頭、冇腰骨，面皮更加成尺厚，居然仲想賴死，如果咁嘅人都做到特首，何止香港無運行，簡直無天理。

其實功夫茶今日係為游伯開心。邊個游伯？咪係興訟挑戰綜援制度嗰位古稀老翁囉。高等法院上訴庭尋日就兩宗綜援案件作出裁決，其中一宗就係裁定游伯勝訴。

講起游伯嘅「秋菊打官司」故事，真係一匹布咁長。○八年，游伯畀內地製衣廠辭退，被迫回流香港，想自食其力都無人請，生活困迫到三餐不繼嘅地步。嗱嗱嗱，游伯山窮水盡，申請綜援係咪唯一出路先？點知被社署僵化政策攔路，當局規定綜援申請人申請前必須連續居港最少一年，期間離港唔可以超過五十六日。喂，游伯失業啱啱回流香港，家徒四壁，社署居然見死不救，唔通叫人瞓街乞食咩。唉，正因為社署官僚僵化，唔少回流長者叫天不應，叫地不聞，你話港產官僚幾咁食古不化吖！

更加不化嘅係，高院一○年已裁定社署嘅規定違憲違法，點知社署執迷不悟，仲要提出上訴，好彩官司拉鋸兩年，上訴庭終於扑低社署。

上訴庭判社署敗訴嘅理據好多，功夫茶最認同其中一點，就係一名被僱主指派到內地工作嘅港人，對香港嘅貢獻同承擔，比部分長期留港嘅人士更多，社署以離港日數來衡量係唔合邏輯嘅。無錯嘞，長者為香港勞碌大半生，對香港嘅貢獻隨時多過嗰啲尸位素餐嘅港府高官啦，晚年享受綜援網保障，絕對唔過分啫，吓話？

計功夫茶話齋，港府坐擁金山銀山，應慳則慳，應使則使，照顧無依長者係分內事，責無旁貸吖。你哋要記住，社署嘅職責係扶弱濟貧，唔係逼窮人上絕路呀！

講到應慳則慳，應使則使，尋日又有一個例子喇，上訴庭喺另一單關於綜援嘅官司，裁定新移民居港未滿七年唔可以領綜援。咁就啱啦，市民唔會有異議㗎，話晒有權利就有義務，要享受社會福利，都要先對社會有所貢獻至得嘅。

一句到尾，綜援制度受挑戰，皆因社署太僵化。各位港產官僚，遺棄老人有損陰德，若然對貧困長者苦苦相逼，小心收尾嗰幾年呀！