「盡把哀音訴，嘆息別故鄉」，如果粵劇紅伶紅線女唱番首本名曲《昭君出塞》，一定會有感而發，慨嘆一番，不過今次唔係別故鄉，而係別新光。事關有「粵劇殿堂」之稱嘅北角新光戲院，下個禮拜日做完最後一場粵劇，從此成為絕唱，港人又多咗個集體回憶。
本港最後一個傳統粵劇場地即將收檔，戲迷依依不捨，有人撲飛欣賞最後一夜謝幕大戲，有人把握最後機會影相留念，亦有人發起簽名要求政府介入，保住呢個陪伴戲迷四十年嘅粵劇界地標。
市民唔捨得新光，除咗呢間戲院地點就腳，經常有好戲上演，係唔少老倌名伶成名之地，佢哋更擔心新光消失會令粵劇加快式微。話時話，戲迷嘅擔心唔係冇理由，粵劇界冇咗新光呢個表演場地，而西九計劃就蝸行牛步，戲曲中心仲要等到二○一五年至落成，正如有人話齋，呢三年真空期係粵劇界嘅冰河期，真係一啲都冇講錯。
好簡單，酒樓食肆面對經營成本上升就話可以大舖搬細舖，地舖搬樓上舖啫，但戲院點搬吖？唔通改成「樓上粵曲茶座」，從此唔做大戲咩？所以話，失去長久表演場地，粵劇呢項世界文化遺產遲早玩完嘅咋。
其實，新光戲院近年已經多次傳出結業消息，早喺○九年，因為業主大幅加租，戲院差啲執笠，後來經粵劇界極力爭取，終於成功續租三年。可惜好景不常，業主今次以「商業考慮」為由唔再續約，睇怕凶多吉少咯。
在商言商，業主收番物業作其他用途，賺取更高回報係無可厚非。問題係，粵劇界缺乏表演場地，生存空間收窄，已經唔係一朝一夕嘅事，業界同戲迷多年來大聲疾呼，但港府關人個關，咁多年來翹埋雙手乜都唔做，所謂推動文化藝術，根本得個講字。
本來呢，如果西九文化區能夠早日落成，粵劇界都仲有個選擇，可惜，港府做嘢慢條斯理，一拖再拖，西九家陣仲係一塊爛地，問你服未。
提起西九，真係火都嚟埋。前政務司司長唐英年擔任西九管理局主席多年，對粵劇界嘅困境竟然不聞不問。呢，八和會館主席汪明荃前排踢爆，唐唐掌管西九咁多年，連佢個影都未見過，唔知做過啲乜。最騎呢就係，唐唐一宣布參選特首就扮晒嘢，走去西九大戲棚睇戲，好似好關心粵劇咁，你話夠唔夠假吖。
明明係做騷，偏要充戲迷，計功夫茶話齋，唐唐咁有做戲天分，唔好嘥噃，不如加入戲班為粵劇做番些少貢獻，咁都叫做廢物利用吖！