嘩嘩嘩！本地職場將出現幾十份超級筍工呀，你都咪話香港唔係遍地黃金，執金都執到手軟！
嗱，超級筍工真係好過癮㗎，入職要求低到極。無需經驗，不問學歷，男女不拘，老嫩無妨，總而言之你有一張香港永久性居民身份證就有資格入職。至於收入咯喎，坐穩呀，千祈唔好嚇暈，月薪十四萬大元！
講到呢度，大家一定會好奇咁問，到底係乜嘢超級筍工咁過癮呀？好，開估嘞，超級筍工就係立法會議員。立法會秘書處建議，將下屆立法會議員嘅薪酬水平同政策局局長月薪嘅一半掛鈎，由現時每月七萬多元，增加接近一倍至十四萬元。立法會議員酬金及工作開支償還款額小組委員會主席劉慧卿就話嘞，建議有助吸引更多社會精英投身政界。
你知啦，議員一職真係毫無要求㗎，話之你係未畢業嘅小學雞，理得你有冇相關經驗，只要你有辦法絞盡腦汁討好選民，你就有機會投身立法會。喂，大拿拿月薪十四萬喎，簡直筍到出汁啦。
立法會秘書處係咁講嘅，上月訪問咗三十多名議員，受訪議員平均每周投放五十九小時喺立法會工作。大部分議員認為職務係一份全職工作，現時薪酬不能反映工作嘅複雜性，亦不能鼓勵有良好專業背景嘅人士投身議會工作。
加薪一倍益議員，得益者當然開心啦，問題係，小市民又會點睇呢？不如咁啦，功夫茶想像一下小市民心聲，睇怕以下係相當有代表性嘅——
「唓，你班友仔唔係遲到早退就係開會瞌眼瞓，仲經常搞到人數不足而流會，何德何能享受月薪十四萬呀？」
「頂，議員民望咁低，形象又唔討好，一時係亂掟飛機嘅頑童，一時係大打出手嘅爛仔，出醜出到台灣，攞咁高收入唔啱數喎！」
「喂，立法會之內出晒名多懶蟲，有人全年都冇動議過一次，加薪一倍即係浪費公帑啫！」
所以話啫，議員一職確係超級筍工，做事少少，月薪多多，真係唔知去邊度搵。之不過咁，益議員無可避免就係嘥公帑，功夫茶相當替草根階層憤憤不平。就好似財爺曾俊華剛剛公布嘅收工預算案咁吖，名義上大灑金錢放水，實際上Ｎ無人士並未受惠。假如你係執紙皮嘅拾荒婆婆，一聽到為民請命表現平平嘅議員居然可以加薪一倍，怕且會激到嘔血。
家陣有六十個議員，每人每月加薪七萬，一年額外支出就係五千萬。如果議員唔想成為物非所值嘅貴價劣質貨，咁啦，自我增值啦，最低限度唔好再做一條餐餐缺席會議嘅大懶蟲！