香港地人多車多，食肆霸佔行人路營業，既阻街又危險，梗係應該取締啦。不過，講到阻街咯喎，始終唔及食環署，事關佢哋懶到出汁，掃蕩違規食肆唔嗲唔吊，搞到問題不斷惡化，簡直就係尸位素餐嘅大食懶！
食環署掃蕩阻街食肆不力，點懶法呢？犀利咯，連申訴專員都要主動介入調查，要搵出原因，你話食環署係咪羞家吖！
申訴專員黎年係咁講嘅：「從所處理的投訴個案及日常觀察注意到，食環署就食肆阻街的規管及執法行動有欠成效，阻街問題往往持續未獲解決。」一針見血，句句到肉，食環署呢鋪無得唔認係大懶蛇啦！
事實上，申訴專員並非無的放矢。食環署數字顯示，食肆阻街投訴上年共有六千二百宗，比前年上升咗三成，但食肆因而被暫時吊銷牌照嘅宗數卻不增反減，上年只有八十宗，比前年九十宗仲要少，乜嘢原因，大家心知肚明啦。
冇錯，食肆阻街亂象叢生，食環署闊佬懶理，申訴專員的確好有必要查一查。例如話，食肆明目張膽阻街，晚晚喺行人路大排筵席，食環署究竟係發雞盲睇唔到吖，定係隻眼開隻眼閉故意縱容？又譬如話，食環署趕絕老弱小販兇神惡煞，一時追到人哋衝出馬路被貨車撞到飛起，一時累到阿伯跳落河浸死，但係點解打擊食肆阻街就軟手軟腳？到底食環署係欺善怕惡，定係雙重標準？
等功夫茶運用少少想像力估吓，食肆阻街問題不斷惡化，申訴專員調查結果九成九歸納出呢七個字：食環署疏於執法！
嗱，申訴專員嘅調查結果暫時未知，不過，功夫茶家陣就可以提醒食環署，食肆阻街問題可大可小，除咗造成街道阻塞、環境衞生惡劣同噪音滋擾，有啲食肆將火爐周街擺，更加容易釀成火警，威脅路人同居民安全。花園街排檔亂象叢生，最終一場大火造成死傷枕藉嘅沉痛教訓，唔通食環署仲未知驚？
不如咁啦，麻煩申訴專員做調查做得徹底啲，幫手調一調食環署署長梁卓文。你知啦，上樑不正下樑歪係特區官場常規，食環署有問題，喺梁卓文身上一定搵到線索。當然啦，最能夠治本嘅做法，梗係調埋梁卓文嘅上司周一嶽啦。主管食衞局嘅周一嶽渾渾噩噩，梁卓文有樣學樣，久而久之，食環署咪變成大蛇竇囉！
一句講晒，食肆阻街弊端多，嚴肅執法不容拖。梁卓文如果無心清理食肆阻街亂象，就唔好阻住地球轉，唔該自動消失喇！