隋文帝時大儒王通說：「古之從仕者養人，今之從仕者養己。」這話，陷入官商勾結醜聞纏身的煲呔曾，恐怕會有多少「感通」；之不過，「養己」養到「食遍省港澳，歎盡海陸空」，揩油揩到最後一秒，舔到盡，那「食相」太難看了！
老朽原本以為禮賓府月耗電費二十多萬，夕陽政府或許可萬盞燈火賀下台。一向漠視民間疾苦，煲呔曾七年任期內，窮人不減反增，每次施政報告，佢一味狗噏話要「將個餅加大」，如今，醜聞一波未平一波又起，睇怕要萬噸臭蛋轟佢下台！
有議員話佢「群賊創新天，窮人墮深淵」，如今細想起來，老朽哦然驚嘆：原來「將個餅加大」——唔係為民而係「養己」！
晚清「中興四傑」之一的胡林翼，其「為政訣」云：「以做百姓之心做官，以治私事之心治官事。」為政之要以民為本，為事之要公勝於私。知民之難，勤以為官；知民之苦，簡以為政；知民之憂，廉以為政。如今，煲呔曾及其班子，為政倒行逆施，州官可以放火，百姓不可以點燈，阿哥，呢個係乜嘢世界啊？放蛇捉藥行唔收五毫膠袋稅，可以鍥而不捨，誓要罰人二千大元！喂！今次廉署面前擺明有「百獸之王」而唔係烏蠅，廉署如果唔秉公辦理好好把握，則反腐利器必毀於一旦。
美國政治哲學家羅爾斯話：「正義是制度的首要美德。」廉署成立三十八年，是否真正做場好戲，老朽擔好櫈仔坐定定等住睇矣！