真不幸，渣打馬拉松明明係香港嘅體壇盛事，而且辦得愈來愈有聲有色，今年更加有七萬人參與刷新紀錄，點不知就係搞出人命。一名二十六歲本地男跑手完成二十一公里半程馬拉松之後暈倒，送院搶救無效最終死亡。另外，又有一男一女跑手危殆。
唉，跑步原意係強身健體，因乜事幹連命仔都冇埋嘅呢？心臟科專科醫生分析，死因可能同隱性心臟病或者腦血管病有關。功夫茶唔係專家，當然唔知真正嘅死亡原因啦，之不過咁，有一件事不可不知，原來大會安排出現漏洞！
跑步跑到危殆嘅二十五歲莫姓男子，懷疑係頂包代替三十三歲朋友參加半馬賽程。喂，大會冇核實身份嘅咩？點解任得一個唔知頭唔知路嘅神秘人參賽？冇事冇幹就話啫，家陣出事喎，跑到危殆喎，條數點計先！
除咗有人死亡有人危殆，今年整項比賽總共有六百五十幾人抽筋，三十八人送院，送院數字比去年九人飆升三點二倍。渣打馬拉松籌委會主席高威林係咁講嘅，沿途有超過六百名救護人員以及十架救護車部署，現場有足夠醫療措施。之但係咁，死者暈倒之後第一個為佢施救嘅並唔係救護人員，而係熱心助人嘅跑手。對於呢家嘢，功夫茶認為大會有檢討必要，畢竟熱心助人嘅跑手未必係專業㗎，下次假如再有類似情況，錯失急救嘅黃金時間邊個賠番條命畀人呀？
講到檢討，高威林真係必須切實檢討。首先就係核實身份嘅漏洞一定要堵塞，點都唔可以容許頂包，撇開安全情況唔計，如果頂包選手居然贏得獎項，都有違體育精神啦。
其次咯喎，有必要切實檢討嘅係監察選手嘅健康狀況。高威林話喎，曾經考慮過要求選手提供醫生證明，不過參賽者來自世界各地，實施上有困難，經過今次事件之後，大會會重新考慮要求提供醫生證明嘅可行性。
計功夫茶話齋，人命關天，安全第一，理得你有幾困難都要做。不妨幻想一下吖，香港有一個叫做曾俊華嘅傻仔，離任財政司司長之後百無聊賴，忽然覺得跑步好過癮，唔理自己年事已高，又唔理自己曾經心臟病發，係都要報名參加明年嘅渣打馬拉松。如果大會冇要求呢一個姓曾嘅傻仔提供醫生證明，任得佢勇者無懼頂硬上參賽，即使天主保佑冇搞出人命，跑到嘔白泡都唔好啦，吓話！
順帶一提，雖然專家冇話死因同天氣有關啫，但係香港嘅空氣污染實在得人驚，如果唔做好環保工作，下次唔知會發生乜嘢事㗎。
總之，切實檢討馬拉松，跑死一個也嫌多！