鬍鬚曾今日面對財政預算案二讀辯論並進行表決，見佢之前透過網誌表達心聲，並拋書包引美國大文豪馬克吐溫名句：「若我們都思想一致，則大為不妙，只有意見不同，賽馬才會出現。」佢以為引文豪名言，就可以為其年年換湯唔換藥的「派糖」小恩小惠上遮瑕避醜，看來「反為不妙」。預算案擺明紓困無方，遏止樓市飆升無力，明明無前瞻性，你叫班議員如何扮成「獨上高樓，望盡天涯路」？如果得，佢哋投身影視界，個個不是「影帝」就是「影后」喇！
預算案空洞無物，你話「不少議員都將焦點放在二百多億元的紓困措施上，較少觸及政府全年超過三千億元開支的整體狀況或近年開支的加幅，例如學童上網津貼、推動電動車等措施」，請恕老朽老眼昏花，失敬失敬，淨係睇你表面曲線未玲瓏浮凸，而睇唔到你嘅「內在美」，原來別有洞天非人間，「以貌取人，失之俊華！」此之謂耶？
一個人跌落地，一係低低地躀一鋪，一係抓把沙，鬍鬚曾卻抱起大石，以為攬住大文豪嘅名句就可解構遮擋貧血嘅預算案！鬍鬚曾應明白「與時俱進」的道理，年年停留「派糖」階段，拒絕進化，自然要遭淘汰，還期望甚麼「賽馬才會出現」？啄木鳥啄木不止（一天啄樹高達一萬二千次，頻率有時高達每秒二十次），是因為牠進化出了一個擁有海綿狀骨頭的厚頭骨，能像海綿一樣保護着大腦。要是啄木鳥怕腦震盪，早就在地球上消失了！
鬍鬚曾，你若然要死撐，老朽只覺得你連一隻啄木鳥也不如！做預算怕腦震盪，不如快啲轉行。