香港的停車熄匙、徵膠袋稅諸如此類環保政策，除了擾民，空叫對藍天打氣，百姓依然感受唔到綠色生活；而環保政策的混亂，老朽倒強烈感受得到。最近一單都算經典，呢頭環境局副局長潘潔在立法會改善空氣質素小組話：現行資助車主更換歐盟前期及一期柴油商業車輛計劃將於本月底結束，可是反應差，為了迫使車主快啲換車，考慮由四月一日起提高老爺柴油車輛牌照費用！
政府做嘢向來慢三拍，一個豬仔團落難香江，向警方、消委會、旅發局、旅遊業議會等多個部門求助，竟然連吃閉門羹；何以落實加舊車牌費，可以快成咁？莫非潘潔係神奇女金剛，話變就變？三八婦女節過後，女人講嘢果然特別有勁！呢頭噏完，運輸業界已掀起千重浪。大姐，架車舊啫，機器冇壞，使唔使咁歧視啊？我哋都係依足規矩，年年驗車，合格攞牌，難道仲要「德成局長介紹」，才可安心使用？
眼見運輸業、司機大佬反應咁大，邱騰華局長這頭只好權充曹達華角色，代師妹于素秋解圍：「四月一日，我冇呢個政治能力加牌費。」邱騰華一記快刀斬亂麻，化解一場江湖風暴於無形。呢場看似茶杯裏風波，如果不是邱騰華局長回勇不騰雞，反應慢啲，分分鐘演變成「一將無能，累死千軍」。有道是，一個組織的最大危機——不在於外部環境與因素，而在於自身不能識別危機並採取行動。
老朽觀乎邱騰華在「慳電膽」風波之敢於承擔，今次「加牌費」決策之英明神武，果然係朝令夕改，化解一場千架老爺貨車慢駛向禮賓府的風雲，邱騰華有功於社稷！