港產官僚最鍾意趕時髦，可惜往往都係講多過做，口號多於一切，依家潮流興講創意科技產業，新一份施政報告喺呢方面亦有唔少着墨，仲一次過提出八大方向，係威係勢咁款，結果會唔會又係雷大雨小，真係冇人話得埋。
例如施政報告提出將科研開支增加至每年佔GDP百分之一點五，係就係比以前鬆手咗，但比起周邊競爭對手，仍然係小巫見大巫，淨係同一河之隔嘅深圳比，人哋每年投放GDP百分之四喺科研方面，香港簡直跑輸幾條街。開講有話︰三軍未動，糧草先行，深圳推動創科，短短時間搞得有聲有色，家陣已經發展成匯聚全國科研人才嘅「中國硅谷」；反觀本港，連最基本嘅大學科研都長期受困於經費不足，前科大校長朱經武就曾經忍唔住炮轟，可見幾大鑊。
如果大家唔善忘，應該記得上屆政府喺一五年已經提出要將九龍東打造成「智慧城市」。兩年眨吓眼就過，證明原來又係姿勢大過實際。好似用手機App提供區內停車場空置車位數目，唔算咩尖端科技，點知都係得兩成停車場參與，原來大部分舊式停車場根本唔支援提供數據。又好似自動因應交通流量而改變燈號嘅智能交通燈，成個九龍東得一支咁大把。唔怪得大部分「東方報業民意調查」受訪者都鬧爆港府欠統籌，欠配套，未能透過科技便利市民。
講開政府開發手機App，真係火都嚟埋。過去兩年港府大拿拿使超過一千萬元推出超過四十個Apps，結果好多都無人問津，部分只得幾十人下載。鬼咩，呢啲Apps功能廢到無倫，淨係將網頁內容炒埋一碟搬字過紙算數，下載都嫌嘥流量。唔怕貨比貨，最怕唔識貨，其實外國政府開發手機App有唔少成功例子，美國波士頓當局一款手機程式，司機一路揸車一路自動記錄低路面凹凸不平嘅地方，政府部門隨即派員維修，服務貼心大受市民歡迎，唔該港產官僚學吓嘢喇！
最好笑嘅係，施政報告大肆吹噓「Wifi連通城市」計劃如何成功，話自去年中開展以來，免費熱點數目由一千四百個大增至一萬八千多個，後年更會去到三萬四千個，事實係免費Wifi網絡覆蓋分布極唔平均，好多旺區連線速度極慢，部分甚至無法連線，連免費Wifi都未搞掂就學人打造智慧城市，發展創科產業，你話係咪笑大人個口吖。
大家有眼見，創新能力不足已經嚴重影響本港國際競爭力排名，再唔急起直追，遲早被淘汰！