林鄭月娥發表任內第一份施政報告，結果意外驚喜就冇嘞，小恩小惠就有一大堆。本來呢，市民甜吓嘴巴，總算聊勝於無，可惜班官老爺思慮不周，拍拍腦袋就算數，結果未開波就搞到爭議多多，分分鐘好事變壞事，你話係咪吹脹吖。
呢嗱，施政報告宣布推出免資產審查嘅交通補貼計劃，市民使用八達通乘搭港鐵、巴士、小巴、渡輪、電車等主要公共交通工具，每個月超過四百蚊，之後就可享有七五折回贈，只要交通開支達到一千六百元，就可以享受上限三百元嘅優惠。
即係咁，市民一張八達通在手，唔使特別申請，相對算係簡單便捷，而官員尋日上電台烽煙節目，亦滿以為呢份「大禮」可以贏得市民掌聲，點知事與願違，有聽眾話對外交通除咗邨巴外別無選擇，質疑點解冇優惠；同樣被摒除在外嘅紅Van業界，亦係（興）過火屎。
最好笑嘅係，官員呢頭死撐，強調當初冇將邨巴同紅Van納入資助範圍，係因為呢兩類交通工具收費唔受政府監管；嗰頭畀市民鬧多兩鬧，又即時跪低，承諾重新考慮喎。咪畀人睇死，官老爺不食人間煙火，林鄭連八達通都唔曉用，有乜法子唔堅離地計漏招吖。道理其實好簡單啫，既然政策目標係利民紓困，只要乘搭公共交通工具就應該人人有份，永不落空；再講吖，家陣好多紅Van都冇安裝八達通感應器，新優惠正好「倒逼」業界改善服務吸客，一家便宜兩家着，何樂而不為？
除咗唔公平，同樣令人擔心嘅係優惠被內地水貨客濫用。一般人除咗家住離島又或者跨境返工，一個月搭千六蚊車唔係話咁易，內地水貨客就唔同講法嘞，有人計過數，一個月三十日，每日來回上水及羅湖兩次，一個月埋單計數超過二千八百元，分兩張八通達用盡優惠，可享受超過五百元津貼。有人建議將優惠僅限於使用個人八達通嘅市民，問題唔係個個人都有個人八達通，咁搞法盞斬腳趾避沙蟲，便民變擾民嘅咋。
爭拗仲未到此為止o架。搭車搭得最多嘅，仲有一班做速遞員嘅朋友，而大多數僱主會向員工提供八達通搭車，又或者要求實報實銷，到頭來交津都係由僱主袋袋平安，基層速遞員冇乜着數之餘，仲可能畀人批評變相益咗班老闆。
其實孔夫子一早教落喇，不患寡而患不均，派糖嘅嘢，最棹忌就係做唔到雨露均霑。好心港府學吓隔籬澳門咁，現兜兜還富於民，補貼交通費又好，用嚟交租又好，一家大細擦餐勁都好，市民自己話晒事，咁咪乾手淨腳，皆大歡喜囉！