以前宣傳香港旅遊嘅廣告，「笑一笑，世界更美妙」嘅歌仔膾炙人口；而今時今日嘅旅遊大使亦秉承呢個優良傳統，不過就唔係因為態度親切，而係因為返工行行企企食番幾味，遲到早退又得，拍拖咀嘴亦得，輕輕鬆鬆有糧出，係人都笑到見牙唔見眼喇。
唔係誇張o架。每逢長假期，本港多個旅遊旺區例必人頭湧湧，好似土瓜灣區咁吖，人滿為患，加上旅巴違法問題嚴重，搞到七國咁亂。民政事務總署有見及此，舊年以時薪五十二元招聘地區旅遊大使，改善相關問題。例牌嘅嘞，官老爺以為使咗錢就等於解決咗問題，拍拍籮柚關人個關，結果自然同掟公帑落鹹水海冇乜分別喇！
本報記者啱啱過去嘅十一長假實地視察發現，呢班所謂旅遊大使真係Hea到出汁。有人係咁意着住制服，作狀「打卡」影張相當交差，根本冇認真向違泊嘅旅巴司機派發單張及作出勸喻，之後求其巡咗十分鐘就鳴金收兵，足足比原定時間提早兩粒鐘。咁都未算吖，有情侶檔拍拖行孖咇，途中不斷打情罵俏，情到濃時當街激咀，旁若無人，簡直睇見都眼冤。
最離譜嘅係，本報發揮第四權天職，即時向民政總署反映，點知官老爺當耳邊風，問題依然毫無改善，遲到嘅繼續遲到，有人一路巡邏一路喪玩手機，有人提早湊女放學，偷得浮生，各適其適，真係唔到你唔服。
咪以為小事一件吖，着得件「旅遊大使」制服出街，代表住整個香港嘅形象，試想像如果你係旅客，向呢班「大使」求助，點知對方淨係顧住做低頭族，眼尾都唔睄吓你，你會點諗先？再講吖，你話呢度好似阿姆斯特丹又或者東莞呢啲「性都」就話啫，否則當街上演情慾真人騷，你估真係貪好睇咩！有立法會議員就講得啱嘞，旅遊大使求其影張相當交差，反映署方缺乏監管，旅遊大使有等於冇，最終只會破壞香港旅遊形象。
一滴水睇穿整個世界，好似旅遊大使呢類政府兼職，無掩雞籠，專養懶蛇，大家早就見怪不怪。舊年政府統計處展開中期人口統計調查，有人喺社交媒體晒命，留言話返工等放工兼夾午飯時間超長，要幾悠閒有幾悠閒，部分人更化身「精靈訓練員」，講到尾咪因為知道唔會斷正，有恃無恐囉。
講番旅遊大使呢筆喇。客人太少食唔飽，旅客太多吃不消，從來都係本港旅業嘅老大難問題，一日唔增加接待旅客能力，旅遊大使再仆心仆命都係假。《施政報告》話要檢討撤銷限奶令，分分鐘又搞到滿城風雨，添煩添亂嘅咋！