係人都知，《東方》唔止全港讀者最多，獨家猛料同樣多過人，行家眼紅一啲都唔出奇，咁只要係良性競爭，《東方》無任歡迎，偏偏有啲傳媒專走旁門左道，搬字過紙，盜版侵權乜都齊，以為可以瞞天過海喎，實在太傻太天真吖。
係咁嘅，同自認「公信第一」嘅《明報》隸屬同一集團嘅馬來西亞中文媒體網站《中國報》，最近連環被踢爆擅自使用《東方》照片，甚至連文字內容都幾乎一字不漏照抄，擺明有侵權盜版之嫌喇。可能作賊心虛啩，呢個網站刻意將相片上嘅《東方》水印打格仔或裁走，以為神不知鬼不覺，但正如本港大律師話齋，任何人喺未獲授權之下刊登或使用新聞機構嘅圖片，即涉侵權，冇咗水印一樣走唔甩嘅咋。
不如請讀者評吓理吖。嗱，東網喺本月六日上載一篇名為「永久封印凶宅 慘死姊妹花陰魂不散？」嘅報道，事隔不過三日啫，《中國報》即刊載一篇標題大同小異嘅文章，刊登嗰六張相仲要同東網刊登嘅一模一樣，你估真係「如有雷同，實屬巧合」咩。咪以為只係一次半次側側膊唔多覺呀，事實係該網站嘅涉嫌侵權行為接二連三，甚至連文章副題、東網記者嘅大寶號都照抄，偷食唔抹嘴，你話係咪笨吖。
講到呢度，功夫茶不禁諗起魯迅筆下嘅孔乙己，呢位仁兄被踢爆偷書後氣急敗壞，死撐話竊書唔算偷喎，唔通有人學咗嘢？都係法律界人士心水清，指涉嫌侵權者如果係海外公司，香港方面要追究會比較複雜，首先要透過當地律師提告，再由當地法院判案，事關就算喺香港告贏咗，都未必罰到海外公司。嗱嗱嗱，有人之所以抄襲得咁明目張膽，盜版得咁肆無忌憚，咪就係恃住山高皇帝遠囉。不過唔好忘記，該集團喺本港一樣有辦事處，要循法律途徑追究梗有辦法，咪以為過咗海就係神仙吖。
講開又講，同一集團嘅《明報》冇嘢叻，最叻就係刊登「更正與澄清」啟事，一年閒閒哋更正幾十次甚至上百次，「公信第一」喎，簡直笑歪人個嘴，自從商品說明條例生效後，「公信第一」呢幾隻字提都唔敢提，費事畀海關捉貨不對辦吖嘛。正所謂，物以類聚，人以群分，姊妹網媒《中國報》係乜嘢貨色，大家心照喇。
咁當然，講到侵權行為咯喎，絕對唔止《中國報》一家，否則「東方做，蘋果盜」呢支歌仔又點會唱到街知巷聞呀。雖然話不招人妒是庸才啫，但《東方》向來是非分明，絕對唔容許盜版侵權呢啲不法行為發生，敬告所有宵小之徒，睇路吖！