特首林鄭月娥尋日發表上台後第一份施政報告，仲好口響咁話每個人都有責任對損害一國兩制、衝擊國家主權嘅行為「說不」添，講就好聽咯，弊在事實又係另一回事，淨係接二連三噓國歌鬧劇咋，「好打得」都冇晒符喇。
大家都知，香港足球隊最近接連有兩場國際賽事喺主場上演，本來好哋哋嘅體育競技，偏偏部分球迷係都要搞事，當國歌奏起之際發出噓聲或背對主席台，前晚港隊對馬來西亞嗰場直情有人舉埋港獨橫額添，問你點頂。咁仲唔止，散場後仲有部分人意猶未盡，喺球場外揮舞龍獅旗，睇見都眼冤。
睇場波啫，搞到好似做騷咁，仲要係劣質政治騷嗰隻，有冇再離譜啲吖。最慘係球迷搞事，足總及港隊受罪，呢，早兩年世界盃亞洲區外圍賽已經有前科喇，因為部分球迷噓國歌，搞到足總被國際足協罰款，今鋪明知故犯，足總副主席話罰款都係其次，最擔心係港隊作賽資格被取消。呢班搞事球迷到底係愛港定害港，仲使問嘅。
法律界人士係咁講嘅，要對付呢一小撮滋事分子，《國歌法》必須盡快立法，仲要訂明阻嚇性罰則。咁又係呀，《國歌法》今個月已喺內地全面實施，但香港就要進行本地立法，港獨分子趁「真空期」為所欲為，行為過火，早就令人忍無可忍。但令人莫名其妙嘅係，律政司司長袁國強好似你急佢唔急咁款，一味話要小心處理，唔想畀人覺得自由受限喎，同反對派夾晒口形咁。試問除咗搞事球迷、港獨分子、反對派政客會覺得自由受限，邊有市民會覺得有影響（口架）？律政司一味拖拖拉拉，藉口多多，被質疑係「無間道」就係咁解。
話時話，就算立咗法都唔代表萬事大吉嘅咋，如果港府有法不依、執法不嚴，一樣係嘥氣。嗱，鄭松泰呢位小學雞議員咪就係人辦囉，公然侮辱五星旗及區旗都係被判罰款五千蚊咁大把，有乜阻嚇力喎；仲有呀，佔中聲稱有數以十萬計嘅人參與，但只有千零人被捕，真正被起訴嘅更不足一成，仲要以判社服令居多，擺明法不責眾啫，第時《國歌法》會唔會重蹈覆轍，真係講唔埋（口架）。
諗起就火滾，政治唔止入侵校園，仲入侵球場，整個社會嘈喧巴閉，不得安寧，搞成咁，都係港府姑息養奸惹嘅禍。唔係咩，佔中鼓吹違法達義歪風，衍生港獨，已入獄嘅「雙學三子」被吹捧為英雄，漢奸黎等主要搞手更加係至今逍遙法外。你話嘞，當醜被視為美，當違法嘅代價好低甚至零成本，當人們失去對法律嘅敬畏之心咯喎，莫講話噓國歌，造反都冇乜出奇！