古人話，天網恢恢，疏而不漏，即係壞人始終難逃法網咁解，之不過呢句說話喺香港啱一半嘅咋，事關司法保護傘專為反中亂港、壞事做盡嘅漢奸洋奴開啟，無論佢哋做埋幾多陰騭嘢都好，一樣可以打橫行，吹咩！
冇錯，講緊嘅就係壹淫媒老闆漢奸黎嘞。大家都知，呢件契弟向以虔誠天主教徒兼民主鬥士自居，實際上禍港殃民，講一套做一套，淨係今年六月涉嫌刑事恐嚇本報記者咋，左一句「我實會搵人搞×你」，右一句「×你老母×」，個款兇狠到同黑社會冇分別，邊忽似虔誠教徒呀？邊忽符合民主自由呀？話佢係偽教徒、敵基督，打着新聞自由旗號反新聞自由就差唔多。
漢奸黎嘅惡行被本報圖文並茂公諸於眾，全城嘩然，人神共憤。嗱，事發至今超過三個月，警方重案組早就完成調查，亦將資料交咗畀律政司，奇怪嘅係到家陣都冇下文，因乜解究呢？原來律政司一句資料不足，又將個波踢番畀警方，警方再調查一輪，再次將資料交畀律政司，但繼續泥牛入海無消息。喂，一單人證物證俱在嘅案件，又唔係乜嘢複雜大案，咁都要拖拖拉拉，互相扯皮，律政司存心偏幫，呼之欲出喇。
唔係講笑，本報記者自從受到漢奸黎出言恐嚇後，出街都提心吊膽，好驚隨時畀人搞。梗係喇，有人喺大庭廣眾之下恐嚇別人都冇事，司法擺明助紂為虐，受害人求助無門，唔驚至奇。再講吖，漢奸黎身為傳媒老闆，居然帶頭踐踏新聞自由，恐嚇正常採訪嘅記者，如果律政司咁都唔做嘢，日後記者仲點樣採訪呀？香港新聞自由仲有冇保障呀？
講起律政司包庇漢奸黎，已經做慣手勢咯。好似佔中咁，蝦兵蟹將紛紛落鑊，雙學三子仲加埋監添，但被視為佔中總指揮兼最大金主嘅漢奸黎至今逍遙法外，咁就難怪佢有恃無恐，一再講風涼話喇。有人質疑當局老虎屁股唔敢摸，狐狸屁股唔敢摸，就連走狗尾巴都唔敢碰，唔係冇道理o架，否則點會一時「證據太多」，一時「資料不足」，幾反智嘅藉口都噏得出吖。
講到呢度，功夫茶不禁諗起周星馳電影金句：「球證、旁證、足協、足總、足委，全部都係我嘅人，點同我打呀？」香港自詡法治之區，法律面前人人平等，偏偏有啲人可以聲大夾惡打橫行，港府好似驚佢有牙咁款，話冇古怪都冇人信喇。有立法會議員打算去信律政司作出質詢，要求就遲遲唔檢控作出交代，最怕司法同洋走狗沆瀣一氣，全部都係自己人咯喎，講乜都係嘥氣！