功夫茶份人最均真，一向宗旨都係是其是非其非，對住嗰班食嘢唔做嘢做嘢打爛嘢嘅庸官劣吏，固然鬧爆冇面畀；之但係好似海關一類盡忠職守嘅政府部門咯喎，功夫茶一樣唔會吝嗇點讚！
新任海關一哥鄧以海接受本報專訪時透露，經修訂嘅《商品說明條例》自一三年七月實施以來，海關一直大力打擊不良營商手法，其中涉及裝修業嘅投訴，可以話係重中之重，淨係今年頭八個月，就收到一百廿一宗投訴，較去年全年勁升三成四，當中主要涉及貨不對辦以及誤導性遺漏。最令人鼓舞嘅係，海關今年較早時首度成功檢控一間裝修公司違例，雖然公司負責人僅被判罰款三萬元及執行社服令，但已經為業界帶來清晰訊息，千祈唔好以身試法。
呢嗱，呢啲咪急市民所急囉。係人都知香港地上車難，但其實家居裝修陷阱重重，特別係隱藏收費超多，消費者一旦被氹落疊，洗濕咗個頭，分分鐘成為噩夢嘅開始。試過有藝人斥資三百萬元為新居裝修，點知拖咗超過一年都未搞掂不特止，對方一時話唔包樓梯，一時話唔包燈掣，就係咁報價一路追加至五百多萬元，最終要解約兼鬧上法庭，都咪話唔閉翳。
除咗裝修，健身同美容同樣係不良營商手法嘅重災區。舊年有某大型連鎖健身公司結業，海關接獲超過一千六百宗投訴，海關持續雷厲風行採取執法行動之下，有健身中心自願推出冷靜期，對消費者提供更大保障。雖然美容行業唔似得健身公司，好多都係個別經營，情況比較複雜，但海關一樣冇鬆懈，周不時都會主動巡查。
講開不良營商，藥房同海味舖透過以錢代斤、以次充好等手法劏客，多年來一直為人詬病，而海關亦從善如流，主動放蛇出擊。好似啱啱過去嘅十一假期，海關就派員到旺角、尖沙咀以及銅鑼灣等旅客旺區明查暗訪，類似行動近年來持之以恒，黑店已經冇以前咁猖獗。
當然喇，時代不斷進步，科技日新月異，執法部門最緊要與時俱進，唔可以下下睇住老皇曆做人，更加唔可以坐喺度等運到。好似家陣潮流興網購，海關同民間企業合作，研發「大數據系統」，務求更精準及更快速分析網上海量資訊，及早監察網上侵權行為，就係最佳例子。
所以話，世上好多嘢都係事在人為，大家都係納稅人嘅公僕，海關可以「打好呢份工」，食環署、房署、地政總署等衙門卻永遠教而不善，幾乎次次審計署同申訴專員報告都榜上有名，邊啲官有心服務市民，邊啲官hea做呃飯食，一目了然喇！