海關早輪喺土瓜灣拉咗兩名藥店女職員，懷疑佢哋違反《商品說明條例》。話時話，商舖貨不對辦，當局可以拉人封艇，咁市區重建貨不對辦，筆數又向邊個追呢？
冇錯嘞，功夫茶講緊嘅，之唔係觀塘市中心重建項目囉，呢一個堪稱歷來最大規模嘅市區重建project嘅主要部分，包括靠近觀塘道嘅地標式鵝蛋形多用途活動中心，以及別具瀑布特色嘅梯田式公園等，居然好似「八萬五」咁，靜雞雞走數，問你怕未。
面對各方圍插，市建局行政總裁韋志成輕描淡寫，僅僅將問題歸咎於溝通不足，話市建局為免浪費資源，喺規劃修訂審批後先至作建築設計細部工作，最終同○七年嘅設計構想圖唔一致喎。至於乜嘢叫做「為免浪費資源」，佢就彷彿有難言之隱嘞。
大家都記得，當年市建局公布規劃藍圖，強調鵝蛋形活動中心同流水瀑布可以平衡社會對空間同綠化環境嘅訴求，係項目主要新概念，吹到天上有地下無，家陣冇咗呢啲「主要」元素，即係打倒昨日嘅我啦。有地區人士就講得啱嘞，市建局當年經過多輪諮詢至得出原設計方案，家陣話改就改，擺明恰居民落咗疊冇得返轉頭。
退一萬步講，即使終極方案同原先規劃有出入，市建局都應該清晰交代理據，可惜事實啱啱相反，市建局係就係有向區議會簡介修訂方案，但淨係係咁意講吓會增加高度限制，連最新模擬圖都收收埋埋，分明想側側膊蒙混過關。最離譜嘅係，市建局呢頭承諾改善溝通，嗰頭居然話今後唔會再向公眾公布「未經規劃參數探究及可行性研究的構想圖」，以免造成誤會同期望落差。以為鬍鬚曾誇大赤字至玩「期望管理」啫，估唔到連市建局都有呢手嘢出賣，真係唔到你唔服。
點解市建局要黑箱作業，暗度陳倉，講到尾都係錢作怪。今次觀塘項目變動，主要係改成單一平台嘅商場式設計，以及加高地標商業建築二十米等，有人形容係由「社區選擇」變為「市場選擇」，可謂一針見血。查實之前旺角波鞋街重建項目已經係咁，城規會縮減高度限制，市建局第一時間cut走對公眾開放、但冇租金回報嘅空中花園以及體育名人館。佢哋年前一份顧問報告，甚至建議放棄重建收地滯後或嚴重虧損項目，擺明車馬向錢看。
大家有眼見，市建局發展項目唔係挑肥揀瘦，就係封定蝕本門；唔係利益至上，就係出爾反爾。唔理點講都好，市建局受公帑供養，有一定社會職能，都係時候全盤檢討定位嘞！