係人都知，旺角砵蘭街一帶燈紅酒綠，黃色架步梗有一間喺左近，之但係如果自己居住嘅屋苑砵蘭街化，淪為烏煙瘴氣嘅邪骨勝地，仲招惹埋晒啲唔三唔四嘅好色之徒，咁就認真該煨咯。
唔係講笑，馬鞍山一個居屋屋苑商場，近年突然有多間美容院進駐，呢啲美容院當然唔係幫人做Facial咁簡單，而係掛羊頭賣狗肉，每日都有大量操唔鹹唔淡廣東話嘅大媽，着到花枝招展咁向經過嘅男士拋媚眼，仲不時拉拉扯扯添，到底葫蘆裏賣乜嘢藥，畫公仔唔使畫出腸喇。
嗱，本報記者本住求真精神，不惜放蛇入內一窺究竟，結果不出所料，入面美容服務就冇嘞，提供揼骨按摩就真，仲要係邪骨嗰隻。招呼記者嘅大媽仲乘機推介「另類服務」，話只需加多一百八十蚊就搞掂，唔止自誇手勢好，仲吹噓熟客多，問你服未。
喂，呢度係紅燈區就話啫，實情呢度係民居嚟o架，有老有嫩，有男有女，呢啲色情場所唔止令良家婦女尷尬，直情教壞細路喇，萬一屋企啲男人唔生性，分分鐘搞到家變都似，有冇再離譜啲吖。有居民向本報訴苦，話每次經過呢啲地方都覺得好滋擾，向多方投訴又冇下文，都唔知點算。連區議員都話，呢啲按摩美容院不單止無牌經營，而且涉嫌經營色情場所，背後有冇黑幫操縱都冇人知，單靠商場或法團根本處理唔到，雖然警方曾多次掃蕩，可惜轉個頭又死灰復燃，大媽客照拉，鹹濕佬骨照揼，火照出，唔通真係冇佢哋符？
話時話，邪骨場又點止入侵屋苑吖，工廠大廈又係另一據點。呢，好似屯門工廈區就隱藏唔少呢啲色情場所，有啲仲明目張膽喺網上大賣廣告，講明四百蚊包手淫服務喎，睇見都眼冤。港府成日話活化工廈，又話要將工廈規範化，結果規範化就冇嘞，架步化就差唔多，真係多得班廢官唔少咯。
講到呢度，不禁令人諗起早已成為歷史嘅九龍寨城。當年呢個三不管地帶係黃賭毒嘅天堂，因為歷史問題一直動不得，直到港英政府同北京達成共識，九十年代初先至清拆成功。呢嗱，呢啲邪骨場又係好似三不管咁款，連警察都唔怕，生命力頑強過小強，話係九龍寨城回魂就係咁解。
都係嗰句嘞，只要精神不滑坡，辦法總比困難多。九龍寨城呢啲咁棘手嘅治安毒瘤，到最後一樣順利割除，家陣仲變成美輪美奐嘅公園添，證明世上無難事，何況依家嘅情況小兒科得多。港英政府做得到，特區政府冇理由繼續懶懶閒啩！