開講有話，貧居鬧市無人問，富在深山有遠親。今年內地十一撞啱中秋節，造就八日「超級黃金周」長假期，外遊大軍多達六百萬人次，足迹遍及全球八十幾個國家，盛況空前，就連遠在非洲嘅肯尼亞，亦受大熱電影《戰狼2》帶挈，吸客量勁增逾五成。香港近水樓台，旅客數字止跌回升，一啲都唔出奇。
齋睇數字，的確幾令人鼓舞。據業界估計，今年十一期間每日有二百六十至三百個內地旅行團訪港，較舊年增長四至五成，酒店訂房率增加兩成；事實上，今年首七個月訪港旅客按年亦錄得百分之二嘅增長，唔怪得負責旅遊嘅商務及經濟發展局局長邱騰華尋日鬼咁風騷，形容依家旅遊業嘅環境「有如秋天嘅天氣令人開心輕鬆」；又揚言要吸引唔同旅客訪港，着力發展「一程多站」式旅遊咁話。
邱局長似乎唔記得，秋天天氣除咗令人「開心輕鬆」，「秋老虎」發起威上嚟亦唔講得笑，隨時令人頭暈身(興)兼中暑。呢，好似土瓜灣區咁，近排內地購物團絡繹不絕，違泊旅遊巴通街都係，由朝響按響到晚，附近街坊不勝其擾。違泊旅巴唔單止阻街，亦令校車無法停泊，學童焗住要喺馬路中心上落車，搞到險象環生，總之就烏煙瘴氣，七國咁亂係啦！
客人少吃不飽，客人多吃不消，可以話係本港旅業嘅頑疾，連邱局長自己都識講，旅客數字多與少都有問題，少即係話生意唔好，太多就會令接待能力受到影響，問題係官老爺有乜符弗解決呢？
大家有眼見，近兩、三年內地旅客數字跌跌不休，固然因為部分人趕客唯恐不及，「驅蝗」、「光復」、「鳩嗚」樣樣齊，但冇鬼唔死得人，內地旅客嚴重影響市民正常生活，係不爭嘅事實，啲人就係利用市民嘅怨氣挑起事端。可惜吖，港產官僚一直冇正視問題，增加接待能力得個講字，大嶼山發展呢啲大project坐而論道，連邊境購物城整整吓亦冇晒下文，長此落去，多多旅客都無福消受。
再講吖，旺丁唔等於旺財，今年十一長假增加嘅主要係內地團體客，好似上述土瓜灣一類低價購物團，受惠嘅只有相關產業鏈，對整體社會裨益有限，反而經常鬧出劏客辱客醜聞，整臭香港個朵；仲有，今時今日唔少內地旅客早就由「爆買」轉為「體驗型消費」，香港除咗度度都有嘅大型商場同主題公園，仲有咩獨特「體驗」足以吸引呢批客？
始終都係嗰句，上帝只會留機會畀有準備嘅人。香港旅業不思進取，坐吃老本，一味停留喺成就「並不膚淺，無懼競爭」嘅志得意滿，到頭來財主只會過門不入，肥水流向別人田。