曾健超自願入獄 漢奸黎快啲找數

曾健超自願入冊，到底好似佢自己咁講，要為自己行為負責，抑或怕上訴被加刑唔衰攞嚟衰，只有佢自己心知肚明，但唔理點都好，大丈夫一人做事一人當，家陣曾健超求仁得仁，七警判囚，佔領期間以豬雜襲擊漢奸黎嗰三位「民間俠士」亦坐監多時，漏咗漢奸黎嗰份，點都講唔過去。

大家應該記得，佔領期間漢奸黎日日喺金鐘「私家皇座」打躉，指點江山，好不威風；而喺警方清場行動中，漢奸黎被反對派政客「眾醜拱衞」嘅一幕博拉爛騷，更令人印象深刻。既然漢奸黎咁鍾意做騷攞威，家陣人哋做找數真漢子，漢奸黎冇理由繼續做縮頭烏龜o架，何不倣效古人「肉袒負荊」，打大赤膊將自己五花大綁，送將官去。律政司遲遲唔肯起訴佢，就話擔心佢背後嘅外部勢力，投鼠忌器啫，如果漢奸黎自動送上門來，求拉求判，律政司冇理由唔成人之美o架，吓話？

話時話，政治主教陳日君曾經話過為自己至今逍遙法外而慚愧，漢奸黎更加好口響咁話唔怕踎監，淨係怕洗廁所，一副視坐監如歸嘅架勢，咁就簡單喇，監裏面工種多多，唔洗廁所可以揼石仔剪草又或者整路牌，梗有一款啱佢嘅。

仲有，漢奸黎曾獲外國雜誌肉麻吹捧為「香港英雄」，話佢「面對被捕後果嘅勇氣啟發人心」喎。咁就啱嘞，漢奸黎係時候做番齣好戲，話畀佢幕後老闆聽佢哋冇睇錯人，七警執行職務過火都判咗兩年，漢奸黎貴為佔領幕後黑手、大金主兼前線總指揮，罪大惡極，最起碼要判十碌八碌，就算法庭輕判，漢奸黎都應該主動要求加刑，否則點顯示到佢非凡嘅「勇氣」吖。

嗱，真係有得諗o架！漢奸黎得罪人多，稱呼人少，襯家由旺角排到沙頭角，如果佢洗定八月十五，唔單止好多人開香檳慶祝，畀佢害到雞毛鴨血嘅人咁多，入到去肯定大把朋友同佢「敍舊」。最緊要嘅係，香港社會愈來愈撕裂，愈來愈分化，講到尾都係拜漢奸黎一手搞出嚟嘅佔領之亂所賜。佢老哥入冊，香港少咗個搞風搞雨嘅大魔頭，一天都光晒，你話市民點會唔拍爛手掌吖。

計功夫茶話齋，漢奸黎惡貫滿盈，律政司唔好再耍手擰頭嘞。反正律政司手上「證據太多」，要告到有啲人坐穿牢底，話都冇咁易喇！