香港樓價高、租金高，咪以為淨係大人買唔起樓閉翳，其實小朋友都一樣係受害者，事關耐唔耐就有幼稚園捱唔住貴租關門大吉，學童淪為人球，真係睇見都心噏。
話口未完又嚟喇。九龍塘一間有十幾年歷史嘅幼稚園突然宣布今年七月停辦，受影響學生超過三百人。話就話校方接洽咗其他幼稚園接收學生，教育局亦強調區內有足夠學額應付需求，但實情係咪咁冇人話得埋，仔女新學年有冇書讀？讀新校又適唔適應？嗰種徬徨同無助，真係不足為外人道。
幼稚園之所以失驚無神執笠，據講係因為校董會早排收到業主通知，話由於要向地政總署繳交放寬土地用途限制、涉及過百萬元嘅豁免費用，擔心日後長期支付費用構成沉重壓力，要求校方一係出錢，一係提前解約，冇得留低。原來之前校方每年都有向城規會申請校舍續約，直至一四年對方加多項條件，要求校方向地政總署申請放寬租契豁免書，跟手業主就被追討豁免費用。
有立法會議員就講得啱嘞，教育局當初檢視同批准私營幼稚園成立時，應該老早處理好潛在嘅租約問題，有乜理由畀個「計時炸彈」自行引爆？家陣最令人擔心嘅係，今次事件可能只係冰山一角，仲有幾多私營幼稚園面臨同樣問題，連教育局都一頭霧水；而最離譜嘅係，教育局局長「吳得掂」被記者追問呢單嘢，唔知係咪仲回味緊早兩日去海南視察時嘅秀麗風光，居然當聽唔到掂行掂過。官僚靠得住，豬乸會上樹，家長都係自求多福好過。
即係咁，業主睇錢份上，既然租畀幼稚園有咁多手尾跟，不如另覓好租戶，呢點無可厚非。不過其他業主就冇咁客氣嘞，加租獅子開大口嘅大有人在，問題係幼稚園就算捱得起貴租，羊毛始終出在羊身上，最後都係轉嫁畀家長。好似今次結業嘅幼稚園咁，每個月學費盛惠七千大元，仲貴過大學，都咪話唔乸脷。港府實施免費幼兒教育後，仲有大批家長要自掏腰包支付學費差價，依家知點解喇。
唔知大家有冇發現，學校不敵租魔被迫關門大吉，係得幼稚園至會發生。道理一字咁淺，小學、中學用嘅係政府校舍，大部分私營幼稚園租用私人物業，肉隨砧板上咯喎，咪惟有揸頸就命囉！
所以話，要徹底解決問題，歸根究柢都係政府為非牟利幼稚園提供更多校舍。講真，香港又唔係冇地，空置小學校舍、廢棄公務員宿舍以至私人會所等，選擇多多……爭在官老爺有冇心搞嘅啫。當然喇，吳得掂收工在即，無心戀戰，同佢講都係嘥氣，家長惟有希望接棒嗰位冇咁廢喇！