港府高官話，如果擴建堆填區計劃被否決，垃圾圍城指日可待，大家信唔信呢？功夫茶就絕對相信嘞，你知啦，香港除咗廢物多，廢官一樣咁多，面對垃圾問題一味逃避，從來唔識點解決，再咁落去，垃圾圍城遲早噩夢成真o架。
唔使講其他，擴建堆填區就係老問題啦，一波三折，阻力重重，計劃一出台就被人柴台，隨時又係跪低收場嘅咋。嗱，港府原定最快下星期二向立法會申請撥款，但考慮到地區反彈強烈，家陣又話決定押後闖關，希望以時間換取談判空間，由港府高層牽頭協商補償方案，藉此換取立法會支持咁話。
本來呢，明知硬闖一定撞板，押後闖關徐圖後計都無可厚非嘅，最怕港產官僚做事有頭無尾，眼高手低，加上港府弱勢，施政寸步難行，就算押後闖關，結果都係一樣過唔到嘅咋，到時垃圾問題唔止紓緩唔到，反而惡化咗，咁就更加弊！
嗱嗱嗱，擴建堆填區大計真係分分鐘泡湯o架。係人都知，喺地區人士強烈反對下，擴建將軍澳堆填區凶多吉少，至於屯門同打鼓嶺堆填區，地區人士堅持三區一齊落水，與將軍澳「共同進退」，你話嘞，喺咁嘅環境之下，港府想打擴建堆填區主意，係咪隨時凍過水吖？
講開又講吖，香港嘅廢物與廢官與日俱增，就算擴建堆填區闖關成功，都只能夠治標，唔能夠治本。係人都知，堆填區其實只係一個超級垃圾桶，總有填滿嘅一日，唔通幾年後爆滿，又再擴建咩？貪官嘅欲壑就話難填啫，堆填區眨吓眼就填滿，如果再唔諗其他辦法，唔好話將軍澳居民要與垃圾為伍，話唔定七百萬香港人都要瞓垃圾崗呀！
一句講晒，港府唔可以再做鴕鳥，埋首垃圾堆逃避責任，擴建堆填區終非長久之計，最緊要開拓其他出路，多管齊下先至可以解決垃圾問題。至於有乜嘢辦法，咁就要留番畀港產官僚諗啦，佢哋逗咁高人工，有啲仲可以放假一年白支全薪添，唔通佢哋淨係識食飯瞓覺，製造廢料咩！
其實，辦法唔係無，只係港府做唔到啫。一來因為港府弱過弱雞，施政動輒得咎，好似興建焚化爐咁，一遇到反對聲音就縮沙，結果講咗咁多年仲係無影無蹤；二來因為港產官僚無心無肺，做垃圾分類、源頭減廢做到垃圾一樣，試問香港點可能唔垃圾圍城呢？
總言而之，垃圾問題不能拖，廢官逃避必遺禍。擴建堆填區闖關可以押後，但係處理垃圾問題唔可以再拖，環境局局長黃錦星千祈唔好學前朝政府做逃兵呀，如果唔係，就算唔垃圾圍城，隨時垃圾圍「星」，到時唔該閣下自動自覺送入堆填區，橫掂堆填區遲早爆滿，多一件廢物亦無所謂啦！