成日話本港旅遊業陷入寒冬，到底點樣慘情法？只要睇吓最近盛事基金壽終正寢，同埋美食車一開車就「死火」，就知道旅遊業真係弊一弊都冇咁弊。
先講盛事基金，自從推出以來，港府冇監冇管，搞到醜聞多多，淪為「醜事基金」。最攞命嘅係，香港地所謂盛事屈指可數，唔係國際欖球賽就係馬拉松比賽，官老爺自己都承認，基金多年來批出嘅項目中，有超過七成係重複項目，簡直嘥氣，摺埋都係意料中事。
至於美食車，就更加係得啖笑。作為前財政司司長鬍鬚曾九年幾任內最「亮麗」政績，出閘短短一個月就脫腳，有檔主每日做得幾舊水生意，連最基本開支都維持唔到，迫不得已改賣魚蛋、燒賣等地道美食救亡。最近有冰室未落場就褪軚，宣布退出計劃，咪就係睇死美食車冇前景咯。
鬼咩，香港唔似得外國咁大地方，美食車要同通街通巷嘅食肆競爭，加上計劃限制多多，地點人流太少，新鮮感過後自然無以為繼。正如「東方報業民意調查」顯示，大部分受訪者直指政府欠缺周詳考慮，加上配套不足，更加係玩殘經營者。
正所謂一節見則百節知，盛事基金同美食車唔得掂，反映港府推廣旅遊業根本就係大隻講，求其拋個政策出嚟就當交咗差，之後關人個關，完全冇通盤規劃。有立法會議員就講得啱嘞，港府旅遊宣傳到依家仲用山頂、購物、美食天堂等招徠，十年如一日，至於未來吸客新景點，好似西九文化區、故宮文化博物館以至統一大嶼山旅遊項目等，唔係一拖再拖，就係十分惹火，睇怕都係得個噏字。香港旅遊基建等運到，反觀周邊競爭對手不斷出招，唔使講得遠，淨係上海迪士尼樂園已經搶咗香港唔少客喇，此消彼長之下，訪港遊客人次連跌三年，有乜出奇吖。
食老本都算嘞，連固有優勢都保唔住先至大鑊。香港「好客之都」個朵近年被「驅蝗」、「光復」等趕客鬧劇搞到臭晒，港府撳唔住不特止，反而陪嗰班搞事分子一齊癲，減少內地客人數唔在講，買多罐奶粉仲隨時拉人坐監，係人都怕怕喇。仲有吖，近年旅遊業醜聞不絕如縷，強迫購物、打死旅客樣樣齊，港府居然拖到依家至成立專門監管機構，反應再慢啲吖，笨！
話時話，負責旅遊嘅商經局以前由鬍鬚曾管轄，點知佢淨係識廢噏「香港旅遊會展優勢唔係膚淺，無懼競爭」，坐井觀天，不思進取。計功夫茶話齋，港府繼續抱住呢種「無懼競爭」嘅Hea做心態，旅遊業想唔死都幾難！