港產官僚執法不嚴，巡查不力，搞到僭建物遍地開花，大家早已見怪不怪，估唔到家陣居然發展到出現「僭建村」，問你服未！
唔係功夫茶亂噏o架。呢，元朗公庵路附近有一列兩層磚屋，舊年以低於市價一半嘅價錢吸客，結果反應熱烈，其門如市。點解有咁大隻蛤乸隨街跳？原來有人將農地擅自改成住宅用途，換句話講，即係違反土地契約。最無辜嘅係，有市民以為執到筍貨，買入或者租住呢啲單位，最近收到地政總署通知話要收回作官地，至知上當受騙，向賣家要求退款，可惜對方已經不知去向，受害者叫天不應叫地不聞，都咪話唔徬徨。
記者去現場睇過，發現已經起好嘅磚屋超過五十幢，施工中嘅亦有十幾幢，話係「僭建村」真係一啲都冇誇張。奇就奇在幾十幢樓由起好到出售，肯定唔係三幾日嘅事，點解地政官僚一直唔執法？唔通佢哋睇唔到？其實，磚屋群隔一條街就有個豪宅新盤，有人大興土木僭建磚屋，當局咁都睇唔到，你話係咪匪夷所思吖？唔通真係要喺禮賓府後花園僭建，當局至肯做嘢？
協助苦主嘅立法會議員就講得啱嘞，有人喺農地上僭建成條村，當局竟懵然不知，令市民誤墮置業陷阱，隨時血本無歸，絕對係失職。
冇錯嘞，當局後知後覺，同助紂為虐冇乜分別咋，你話佢哋使唔使負責吖！講開又講，當局對官地無監無管，烏龍百出，以致官地淪為私地，今次只係冰山一角咋。嗱，全港有唔少官地位於市區，其中幾十幅土地以超筍價甚至免費租畀私人會所，當局將珍貴土地資源「賣大包」送畀權貴享樂都算嘞，最離譜係部分會所違規經營食肆、婚宴場地、按摩房，五花八門，而當局居然闊佬懶理。至於好似元朗荔枝山莊咁，長期霸佔官地，如果唔係審計報告踢爆，當局依家可能仲關人個關吖！
講到底，僭建問題積重難返，當局監管不力固然難辭其咎，房屋供應嚴重不足至係癥結所在。正如有買咗僭建磚屋嘅苦主反映，家陣樓價高不可攀，根本無辦法買得起，咪諗住博吓囉，家陣置業夢碎不特止，仲面臨迫遷之苦，真係一殼眼淚。正所謂，有頭髮冇人想做瘌痢，非法寮屋及僭建物近年喺新界如雨後春筍，咪就係因為樓價長升長有，無殼蝸牛退而求其次，導致寮屋有價有市以及僭建物遍地開花囉。
所以話，房屋問題一日唔解決，僭建亂象就冇可能消失，就算今日拆咗元朗呢條僭建村，日後仲會有千千萬萬條僭建村o架咋！