未入正題之前，先同大家講一個笑話。
話說一名雙失中年走入勞工處搵工，勞工主任問：「請問你嘅教育程度係？」答道：「細時唔讀書，小學未畢業。」問：「咁體力勞動你做唔做到？」答：「咪搞，企多陣都覺得攰。」問：「咁你最擅長乜嘢呢？」答：「本人天生三寸不爛之舌，最叻就係譁眾取寵做騷，掟嘢、爆粗、拉布同抬棺材樣樣都得，係呢，其實我嘅要求都唔係好高啫，只要份工做得舒適，返工時間彈性，每月有十萬八萬收入，可以畀我『三點不露』隨便曠工同遲到，返工時可以瞓覺、遊魂、上網睇艷照解悶，麻煩你幫幫我，畀我一展所長啊！」勞工主任爆頭：「諗來諗去，全香港只有一份工啱你，去做立法會議員喇！」
唔係講笑，今時今日喺香港做立法會議員，學歷不拘，薪高糧準，唔止有齊以上好處，仲有一項得天獨厚嘅特殊福利，就係用公帑周遊列國。呢，立法會議會聯絡小組委員會早前先至話要去北歐「外訪」，家陣又輪到工商事務委員會計劃拉大隊去以色列「考察」啦！
或者你會問，香港同以色列風馬牛不相及，班議員山長水遠去考察乜嘢呢？即係咁，欲遊之埠，何患無辭，港府計劃設立創新及科技局，工商事務委員會打蛇隨棍上，計劃八月初去當地取經喎，最離譜嘅係，六日行程只有一日同公務有關，其餘幾日係咪留番來遊山玩水呢？遊埠當公幹，議員樂悠悠，旅費幾貴都好，全由納稅人埋單，你話係咪好正呢？
講開又講，立法會外訪爭議都唔係第一次啦。舊年之嘛，八名議員同一名行會成員攜眷接受航空公司款待去法國旅遊，利益輸送嫌疑水洗唔清，引起全城嘩然。點知你有你批評，議員我自為之，事過境遷，又有人巧立名目組團遊埠，證明佢哋死性不改，面皮厚過城牆！
最好笑嘅係，對於前特首貪曾被揭成日同富豪把臂同遊，「貪遍省港澳，歎盡海陸空」，前廉政專員貪湯化身「酬酢專員」，「北上狂擦鞋，茅台換政協」，立法會議員紛紛「為民請命」，怒斥絕代雙貪敗壞風氣，損害廉政，點不知有口話人冇口話自己，議員同貪官一擔擔，只係五十步笑一百步咋。唉，天下烏鴉一般黑，行政立法一樣貪，立法會議員雙重標準、寬己嚴人，又點樣令人信服呢？
冇計啦，香港立法會有名你叫「垃圾會」，議員嘅質素早就有口皆悲。不過咁，出得來行，遲早要還，咪話功夫茶唔提醒各位，不知檢點太過貪婪，遲早被選民踢出議會，到時淪為雙失中年咯喎，睇怕勞工處都未必幫到你哋o架！