巡查防火設備，保障市民生命安全，係消防處嘅基本職責。弊在消防官僚有法不依，執法不嚴，搞到次次都要傳媒提醒，問你服未？
唔係功夫茶亂噏。話說元朗丹桂村一間村屋舊年五月發生火警，一名十六歲少女喪生，再次引發社會關注村屋消防安全問題。之後本報踢爆，有村屋走法律罅，先按規定安裝消防設備，攞到「滿意紙」後立即拆走設備。最奇怪嘅係，報道出街後，消防處既唔巡查，亦唔執法，一直「零檢控」。申訴專員公署終於忍唔住出手，決定主動調查村屋消防安全措施規管，呼籲公眾提供資料。你話嘞，連巡查防火設備咁簡單嘅事都要由傳媒代勞，消防處係咪失職吖。
即係咁，唔少村屋位置偏僻，出入道路又窄，萬一發生火災，唔易撲救，所以法例規定所有冇緊急車輛通道嘅村屋，都要喺屋內裝設滅火筒、煙霧感應器等消防設備。之不過咁，世不患無法，而患無必行之法，就算法例再完善，如果冇人監管及執行咪又係廢紙一張。消防處翹埋雙手，關人個關，卒之連申訴專員公署都忍唔住介入調查，你話係咪攞嚟衰吖。
嗱，元朗村屋奪命火災，血的教訓歷歷在目；傳媒揭發有村屋陽奉陰違，拒裝防火設備；申訴專員公署亦表示，近三年接獲十幾宗相關投訴。村屋消防設施不足，危機處處，點解消防處仲好似發緊夢咁，乜都唔做呢？須知消防安全關乎人命，意外一次都嫌多，你班官老爺再係咁吊吊揈懶懶閒，唔通真係要再搞出人命至識驚？
講到呢度，大家可能有疑問，傳媒已經詳細報道，有圖有相，消防處點解唔根據線索做嘢？講嚟講去，咪因為消防處不務正業囉。呢，該處之前憑一封子虛烏有嘅所謂電郵投訴，高調派人直闖報館調查，搞完一大輪得個吉，事後連一句解釋都冇。但另一方面，消防處早前畀審計報告踢爆積壓未完成嘅投訴超過一千五百宗，有啲甚至拖延四百幾日都冇人理，最離譜係試過有大廈警鐘一年誤鳴過百次，消防處照樣闊佬懶理，呢啲唔係選擇性執法又係乜嘢呀？
冇辦法啦，可能消防官僚平時實在太忙嘞，除咗打壓傳媒，又忙於集體秘撈，再唔係就喺消防局裏面呼朋引類開Party，冇時間巡查村屋，又有咩出奇喎。計功夫茶話齋，消防處只要將從事「課外活動」嘅一半精力做正經嘢，類似花園街嘅火災悲劇就唔會一再重演喇！