香港係中西薈萃之地，各種文化兼容並包，既有古老嘅，亦有現代嘅，既有傳統嘅，亦有創新嘅，可以講係琳琅滿目，多姿多采。呢，一年一度嘅長洲太平清醮活動，咪就係集古老、現代、傳統、創新於一身嘅文化盛事囉。
同往年一樣，尋日長洲太平清醮活動吸引數以萬計市民及遊客觀賞，歡聲笑語，氣氛熱鬧，完全冇受到時晴時雨嘅天氣影響，人人乘興而去，盡興而歸。咁又係嘅，太平清醮活動將古老與現代結合，將傳統添上創意，歷久常新，充滿生機，點可能唔受市民及遊客歡迎吖！
就以重頭戲飄色巡遊嚟講吖，除咗保留傳統特色，仲加添現代色彩，真係別開生面。最令人拍案叫絕嘅係，小演員以唔同扮相出場，維肖維妙，詼諧幽默。有小演員扮成運輸及房屋局局長張炳良，腳踏大石及蟹，諷刺佢「大石壓死蟹」；有小演員就以政務司司長林鄭月娥裝扮亮相，諷刺佢關於政改嘅「一錘定音」論；亦有小演員諷刺財政司司長曾俊華「來自星星」，完全不知民間疾苦。傳統嘅飄色結合現代嘅創意，切合時弊，令人會心微笑，呢啲咪就係長洲太平清醮活動嘅吸引力囉。
所以話，古老文化只要添上現代色彩，可以繼續發光發亮，長洲太平清醮就係最佳例子喇。香港雖然地方唔大，而且經歷百幾年殖民統治，但到今日仲保留唔少中國傳統文化及本地特色，除咗長洲太平清醮，大澳端午龍舟遊涌、大坑舞火龍及盂蘭勝會等，各具特色，歷史悠久，齊齊被列入國家非物質文化遺產，顯示港人保留中國傳統文化獲得充分肯定，真係相當難得。有人話，香港庇護咗中華文化，將民族美好嘅習性保留下來，免遭浩劫，一啲都冇誇張。
講開又講，傳統活動唔止係歷史文化遺產，只要將佢哋重新包裝，發揚光大，仲可以成為一項產業添。就好似長洲太平清醮咁吖，淨係一個平安包咋，就衍生唔少相關產品，除咗有真包，仲有平安匙扣、平安T恤、平安手袋、平安錢包等等，早前有人搶先註冊「平安」商標，證明呢盤生意真係有得做。
港府成日吹水要發展創意產業，其實創意產業遠在天邊，近在眼前，問題係當局識唔識得把握啫。嗱，只要花啲心思，好多傳統活動就可以全新面貌出現，成為引人入勝嘅城中盛事，呢啲咪就係創意囉，當局又知唔知呢？一句講晒，廿一世紀係知識年代，即係食腦嘅年代，港府既冇頭腦又冇靈魂，學人講創意產業喎，盞笑死人嘅咋！