港府成日呻冇地建屋，搞到要盲搶地，一時寸土必爭，一時見縫插針，一時打郊野公園主意，事實又係點呢？事實咪就係港產官僚本末倒置囉，如果佢哋真係求地若渴，就唔會任由大量官地長期被霸佔喇！
呢，近年非法寮屋日益猖獗，其中元朗及西貢更加淪為重災區，簡直到咗遍地開花、無法無天嘅地步。本報記者日前到元朗視察，發現有非法寮屋唔止佔用官地，仲猖獗到無牌扮有牌，自行喺門前寫上「登記號碼」，仲撕走清拆告示添，直頭視法紀如無物。
西貢嘅情況一樣咁誇張。當地響鐘村近岸位置建有多間有牌照寮屋，有業主居然無視法紀，喺屋後霸地興建千幾呎平房，以為用帆布蓋住頂蓋掩飾，就可以瞞天過海。有附近居民踢爆，平房內部劏成多個房間，估計非法寮屋被用作出租圖利。
唉，香港不斷沉淪，唔通真係墮落到返去遍地寮屋嘅年代？唔好玩喇，就算港府點樣無能，都無理由容許非法寮屋氾濫成災啫。正如有立法會議員話齋，有人魚目混珠建假寮屋，本來已屬嚴重罪行，如果假寮屋用作租售用途，更加涉及詐騙罪，絕對不容姑息！
講到呢度，大家係咪覺得奇怪呢，既然冒牌寮屋違法違紀，點解仲有咁多人鋌而走險？第一個原因，係樓價高企租金昂貴，元朗寮屋有價有市，自然吸引不法之徒渾水摸魚喇；至於第二原因咯喎，咪就係官僚失職囉，當局長期疏於執法，鼓勵僭建多過打擊僭建，非法寮屋唔遍地開花至奇喇。以元朗為例吖，地政署兩年前已經發現有非法建築物，但係居然遲遲唔執法，直到今個月初接獲本報轉介，日前至匆匆拆卸，問你服未。
講開又講，非法霸佔官地嘅何止冒牌寮屋吖。地政官僚又懶又懵，唔少新界官地早就淪為土豪私人俱樂部喇，好似元朗大棠荔枝山莊咁，霸佔官地十八年，佔地多達四萬幾平方呎，如果唔係審計報告踢爆，地政總署依家可能仲關人個關吖。相比之下，元朗寮屋佔官地兩年被取締，已經係小兒科咯。
事實再一次證明，港產官僚做嘢唔叻，吹水最叻，乜嘢寸土必爭，乜嘢見縫插針，全部係吹水唔抹嘴，大家咪當真吖。係人都知，土地係香港最珍貴嘅資源，港產官僚疏懶失職，大量官地唔係被荒廢養蚊，就係被霸佔侵吞，咁搞法，房屋問題又點可能解決吖。
正所謂，治病治源頭。今屆政府成日話房屋問題係施政重中之重，嘆巧婦難為無米之炊，其實計功夫茶話齋，當局與其到處盲搶地，不如先解決班懶散官僚仲實際喇！