學生成績差，原因不外乎兩個，一係資質唔好，一係懶散過人。香港同台灣九十年代幾乎同時推行融合教育，結果成績差天共地，香港輸咗足足九條街，究竟係港產官僚智商有問題吖，定係懶散過人呢？
即係咁，香港特殊學習障礙協會早前到台灣考察，發現當地嘅融合教育發展一日千里，由立法、政策到執行層面，全方位逐步改善，愈來愈全面照顧有特殊教育需要（簡稱SEN）嘅學生。譬如師資培訓，所有教師入職後需每年修讀特殊教育課程，並要達到每年至少三小時嘅培訓時數。至於學校支援方面，當地政府會按照學生不同需要，設計多元化學習模式，因材施教，有教無類。
相比之下，香港就羞家咯。截至舊年四月底，本港公立中、小學嘅教師裏面，分別只有大約一成及兩成七曾經接受有關特殊學習困難嘅基本培訓，而大部分院校更加未將特殊教育列為必修科添。至於學校支援咯喎，一樣係聊勝於無，當局好似交差咁，只設有負責SEN學生行政安排嘅學生支援主任，而且職位屬於兼任性質，咁樣推動融合教育，有成效至奇喇。
正所謂，唔怕唔識貨，最怕貨比貨。港府成日吹水要推動融合教育，吹到自己對SEN學生嘅照顧無微不至咁，點知同台灣一比較，即刻相形見絀，醜態畢露。對於呢個殘酷真相，唔知港產官僚有乜感想，功夫茶就為佢哋感到羞恥，大家都係推行融合教育，人哋寶島不斷前進，一日千里，而香港就牛步蝸行，原地踏步，講出去都丟架喇！
俗語話，教育係成功嘅階梯、人生嘅希望。當局推行融合教育唔湯唔水，丟架仲係小事，誤人子弟至係大問題。難怪有學者直斥，港府無心推行融合教育，令SEN學生嘅求學之路荊棘滿途，促請當局借鏡台灣經驗。
一句到尾喇，港產官僚縮骨卸膊，搞融合教育根本唔係為學生着想，只係為自己交差。嗱，口號就好聽嘞，「共融社會，由學校做起」，但事實係當局根本冇做好份工，將SEN學生踢畀主流學校就關人個關，既無政策配合，又欠缺配套支持，結果融合不成，反而製造矛盾甚至悲劇添。早年有位患思覺失調嘅中四男學生懷疑與同學及老師相處出問題，喺學校墮樓身亡，死因庭裁定死於自殺，呢單悲劇咪就係融合教育唔湯唔水引起嘅囉。
咁講喇，如果真係想做到有教無類，最好嘅辦法就係將班腦殘官僚送晒入特殊學校接受再教育！